​गान्ताेक: सिक्किमको राजधानी ग्याङटोकस्थित रिज पार्कमा आयोजित ‘गुरु रिन्पोछे थुन्कर त्शेचु’ (गुरु पद्मसम्भव जयन्ती) को पावन समारोहमा सिक्किमका राज्यपाल ओम प्रकाश माथुर सहभागी भएका छन्।
​समारोहका अवसरमा राज्यपाल माथुरले उपस्थित विशिष्ट अतिथिहरू, बौद्ध अनुयायीहरू, लामाहरू र श्रद्धालुहरूसँगै विधि-विधानअनुसार पूजा-अर्चना गर्दै सिक्किम राज्यमा सुख, शान्ति र समृद्धिको कामना गरे।
​देवरालीस्थित दोड्रुल छोर्तेनबाट गुरु रिन्पोछेको शोभायात्रा (झाँकी) निकालेर मुख्य मार्ग हुँदै रिज पार्क पुगेपछि मूल समारोह सुरु भएको थियो।
​उक्त आध्यात्मिक उत्सवमा धर्म विभागका मन्त्री सोनाम लामा, ग्याङटोक क्षेत्रका विधायक डीले नामग्याल बरफूङ्पा, स्यारी निर्वाचन क्षेत्रका विधायक तेन्जिङ लाम्था र मुख्यमन्त्रीका सल्लाहकार कुङ्गा नीमाको विशेष उपस्थिति रहेको थियो। समारोहमा विभिन्न विभागका वरिष्ठ अधिकारीहरू, शिक्षक तथा ठूलो सङ्ख्यामा विद्यार्थीहरूको सहभागिता रहेको थियो।