​गान्तोक: सिक्किमको कला, वास्तुकला, फोटोग्राफी र सांस्कृतिक सम्पदाका प्रख्यात धरोहर स्वर्गीय किरण रसाइलीको भौतिक शरीरप्रति उहाँकै निवासस्थानमा पुगेर हार्दिक एवं अन्तिम श्रद्धाञ्जली अर्पण गरिएको छ। सिक्किमको मौलिक पहिचान र कलात्मक गरिमालाई विश्वसामु चिनाउन उहाँले पुर्‍याउनुभएको विशिष्ट योगदानको स्मरण गर्दै उपस्थित सङ्ख्यौँ बौद्धिक तथा सिर्जनशील व्यक्तित्वहरूले दिवंगत आत्माको चिर शान्तिको कामना गरेका छन्। स्वर्गीय रसाइली सिक्किमको कला र सांस्कृतिक समुदायका एक यस्ता मार्गदर्शक हुनुहुन्थ्यो, जसले आफ्नो रचनात्मक क्षमता, असाधारण फोटोग्राफी र दूरदर्शी दृष्टिकोणको माध्यमबाट समग्र राज्यको कलात्मक परिदृश्यलाई एउटा नयाँ र विशिष्ट उचाइमा पुर्‍याउनुभयो। उहाँको यही अतुलनीय योगदानका कारण उहाँको अप्रत्याशित भौतिक अवसानले आज सिक्किमको सम्पूर्ण कला, ललितकला र सांस्कृतिक क्षेत्र गहिरो स्तब्धता र शोकमा डुबेको छ।
​आफ्नो सम्पूर्ण जीवनकालमा उहाँले सिक्किमको परम्परागत एवं आधुनिक वास्तुकलाको संरक्षणमा मात्र नभई फोटोग्राफी र विभिन्न कलाका माध्यमबाट यहाँको प्राकृतिक तथा सांस्कृतिक सौन्दर्यलाई जीवन्त राख्न अहोरात्र कार्य गर्नुभयो। नयाँ पुस्ताका युवा प्रतिभाहरूलाई पहिचान गर्ने, उनीहरूलाई सही मार्गदर्शन दिने र सिक्किमको मौलिक सांस्कृतिक पहिचानलाई जोगाउँदै अघि बढाउने सवालमा उहाँको समर्पण सधैं प्रेरणादायी रह्यो। उहाँको यही निस्वार्थ भावना, कलाप्रतिको अगाध प्रेम र उत्प्रेरणाका कारण नै आज सिक्किमका असङ्ख्य युवाहरू कला क्षेत्रलाई आफ्नो भविष्य बनाएर अघि बढ्न सफल भएका छन्।
​स्वर्गीय रसाइलीले सिर्जना गर्नुभएका अनुपम कलाकृतिहरू, खिच्नुभएका ऐतिहासिक तथा जीवन्त तस्बिरहरू र कला क्षेत्रमा छोडेर जानुभएको गहिरो छाप इतिहासको पानामा सधैं अमर रहनेछन्। उहाँको भौतिक शरीर हामीमाझ नरहे पनि उहाँले समाजमा पुर्‍याउनुभएको अमूल्य योगदान र उहाँको गौरवमय विरासत भावी पुस्ताका लागिसमेत सधैं मार्गदर्शन बनिरहनेछ। कला जगत्‌कै एक अपूरणीय क्षतिको यस अत्यन्त दुखद घडीमा गहिरो शोकमा डुबेका शोकाकुल परिवारजन, आफन्त र प्रशंसकहरू सवैप्रति हार्दिक समवेदना व्यक्त गर्दै यस असह्य पीडालाई सहन गर्ने शक्ति मिलोस् भनी प्रार्थना गरिएको छ।