नयाँ दिल्ली: साउदी अरबले यमनका हूती विद्रोहीहरूविरुद्ध डीएफ-१५ए क्षेप्यास्त्र प्रहार गरेको छ। करिब तीन दशकमा पहिलोपटक साउदी फौजले चीनबाट खरिद गरिएको यो क्षेप्यास्त्र युद्धमा प्रयोग गरेको हो।​रोयल साउदी स्ट्रेटेजिक मिसाइल फोर्स (आरएसएसएमएफ)ले हूतीहरूविरुद्धको लडाइँमा चीनमा निर्मित डीएफ-१५ए सर्ट-रेन्ज ब्यालिस्टिक मिसाइल प्रयोग गरेको सोमबार सार्वजनिक विवरणमा उल्लेख छ। यद्यपि, उक्त क्षेप्यास्त्रले लक्षित निशाना भेट्न सकेन र प्राविधिक खराबीका कारण मरुभूमिमा खस्यो। हूती विद्रोहीहरूले मिसाइलको बुस्टर फेयरिङसहितका भग्नावशेष नियन्त्रणमा लिएका छन्।​साउदी अरबले १९९० को दशकमा चीनबाट यी ब्यालिस्टिक क्षेप्यास्त्रहरू खरिद गरेको थियो। लामो समयदेखि सेनाको भण्डारमा रहे पनि यसअघि युद्धमा यिनको प्रयोग भएको थिएन।​यमनमा विगत तीन साताभन्दा बढी समयदेखि हूती विद्रोही र साउदी समर्थित फौजबीच भिडन्त जारी छ। यस क्रममा हूतीहरूले बाब अल-मन्डेब जलडमरूमध्य जोड्ने रणनीतिक मोखा बन्दरगाह सहरसहित महत्वपूर्ण भूभाग नियन्त्रणमा लिएका छन्। स्थल युद्धमा हूतीहरू हाबी भएपछि साउदी सेनाले हवाई हमला तीव्र पारेको छ।​यमनमा सन् २०१४ देखि २०२२ सम्म चलेको गृहयुद्ध २०२२ को युद्धविरामपछि केही शान्त भएको थियो। तर, गत जुलाईदेखि सुरु भएको तनाव अगस्टको अन्तिम साताबाट पुनः भीषण युद्धमा परिणत भएको छ।