​गान्तोक: पंजाबमा हालै सम्पन्न पाचौँ यू-१५ सब-जुनियर छात्र तथा छात्रा राष्ट्रिय बक्सिङ प्रतियोगितामा सिक्किमकी प्रतिभावान बक्सर सोनिया सुब्बाले कांस्य पदक जितेर राज्यको नाम रोशन गरेकी छन्। यस गौरवमय उपलब्धिका लागि रेशिथाङस्थित खेलो इन्डिया स्टेट सेन्टर अफ एक्सीलेन्स (केआईएससीई), सिक्किमले सोनियालाई हार्दिक बधाई तथा शुभकामना व्यक्त गरेको छ। राष्ट्रिय स्तरको यस मञ्चमा प्राप्त भएको यो सफलता सम्पूर्ण खेलो इन्डिया परिवार, विशेष गरी मुख्य प्रशिक्षिका सुनिता क्षेत्री, हाई-पर्फमेन्स टिम (एचपीटी) र सिङ्गो सिक्किम राज्यका लागि गर्वको विषय बनेको छ।
​बक्सर सोनिया सुब्बाले आफ्नो बक्सिङ यात्राको सुरुवात सोरेङस्थित खेलो इन्डिया सेन्टरबाट गरेकी थिइन्, जहाँ उनको प्रतिभा र खेलप्रतिको समर्पणलाई पहिचान गरी तिखार्ने काम गरिएको थियो। उनको उच्च सम्भावनालाई मध्यनजर गर्दै पछि उनलाई रेशिथाङस्थित खेलो इन्डिया स्टेट सेन्टर अफ एक्सीलेन्समा समावेश गरियो, जहाँ उनले हाई-पर्फमेन्स टिमको विशेष रेखदेख र मार्गदर्शनमा आफ्नो कौशललाई अझ निखार्ने अवसर पाइन्।
​राष्ट्रिय स्तरमा सोनियाले प्राप्त गरेको यो ठूलो सफलता उनको कडा परिश्रम, कडा अनुशासन, दृढता र बक्सिङप्रतिको अटुट प्रतिबद्धताको परिणाम हो। यसका साथै यो सफलताले केआईएससीईका प्रशिक्षक र सहयोगी कर्मचारीहरूद्वारा प्रदान गरिएको उच्च स्तरीय प्रशिक्षण, मेन्टरसिप र खेल पूर्वाधारको गुणस्तरलाई पनि प्रमाणित गर्दछ। खेलो इन्डिया स्टेट सेन्टर अफ एक्सीलेन्सले सोनियाको उज्ज्वल भविष्यको कामना गर्दै आउँदा दिनहरूमा उनले अझ ठूला कीर्तिमानहरू स्थापना गर्ने र देश एवं राज्यको गौरव बढाउने विश्वास व्यक्त गरेको छ।