​काठमाडौँ: लामो समयदेखि गम्भीर खाद्यान्न र आर्थिक सङ्कट खेप्दै आएको उत्तर कोरियाको अर्थतन्त्रमा पछिल्लो समय सुधारका सङ्केतहरू देखिएका छन्। रसियासँगको बढ्दो सैन्य सम्बन्ध र हतियार निर्यातका कारण अर्थतन्त्रमा सुधार आउँदा उत्तर कोरियाली सर्वोच्च नेता किम जोंग-उनको सत्ता पकड झन् मजबुत बनेको छ।
​दक्षिण कोरियाको केन्द्रीय बैंकका अनुसार सन् २०२४ मा उत्तर कोरियाको कुल गार्हस्थ्य उत्पादन (जीडीपी) वृद्धिदर ३.७ प्रतिशत पुगेको छ, जुन विगत आठ वर्षयताकै उच्च हो। विज्ञहरूका अनुसार किम जोंग-उनले सत्ता सम्हालेयता उत्तर कोरियाको अर्थतन्त्र अहिले सबैभन्दा राम्रो स्थितिमा पुगेको छ।
​संयुक्त राष्ट्रसङ्घको तथ्याङ्कअनुसार उत्तर कोरियामा अझै पनि करिब १ करोड १० लाख मानिस (आवादीको ४५ प्रतिशत) कुपोषणबाट ग्रस्त छन्। यद्यपि, युक्रेन युद्धपछि रसियालाई गोलाबारुद र हतियार आपूर्ति गरेर उत्तर कोरियाले आफ्नो अर्थतन्त्रलाई राहत दिलाएको छ। विभिन्न प्रतिवेदन अनुसार उत्तर कोरियाले रसियालाई सहयोग गर्न करिब १५,००० सैनिक र औद्योगिक श्रमिक पठाएको छ।
​रसियाबाट प्राप्त आर्थिक, प्राविधिक र सैन्य सहयोगले उत्तर कोरियाको खानी, भारी उद्योग र मेसिनरी क्षेत्रमा उत्पादन बढाएको छ। यसका अतिरिक्त चीनसँगको व्यापार, आन्तरिक बजारमा सरकारी नियन्त्रण र अन्तर्राष्ट्रिय प्रतिबन्ध कार्यान्वयनमा आएको खुकुलोपनले पनि त्यहाँको अर्थतन्त्रलाई टेवा पुर्‍याएको छ।
​राजधानी प्योङयाङमा बिजुली आपूर्तिमा सुधार, मोबाइल एपमार्फत ट्याक्सी र खाना भिज्ने सुविधा, तथा विद्युतीय गाडीहरूको प्रयोगले त्यहाँको उपभोग्य बजार बढेको सङ्केत गर्छ। आर्थिक सुधारसँगै उत्तर कोरियाले आफ्नो आणविक तथा क्षेप्यास्त्र कार्यक्रमलाई समेत तीव्रताका साथ अघि बढाइरहेको छ।