आईएलएस अस्पतालमा जटिल शल्यक्रियापछि डिस्चार्ज

​कोलकाता: कोलकाताको दमदमस्थित आईएलएस अस्पतालले एक असाधारण र प्रेरणादायी सफलताको घोषणा गरेको छ। हावडाको लिलुआ निवासी १८ वर्षीया नीट परीक्षार्थी सृष्टि दुबेको अत्यन्तै जटिल र जीवनरक्षक कार्डियोथोरासिक ट्रमा (मुटु र छातीको चोट) शल्यक्रिया सफलतापूर्वक सम्पन्न गरी आज उनलाई अस्पतालबाट डिस्चार्ज गरिएको छ। यो सफलता सृष्टिको बलियो इच्छाशक्ति, बाँच्ने संघर्ष र दृढ संकल्पको एउटा अद्भुत उदाहरण बनेको छ।
​एक भयानक सडक दुर्घटनामा परेपछि सृष्टिलाई अत्यन्तै गम्भीर अवस्थामा अस्पताल ल्याइएको थियो। उनको छातीका नौवटा करङ भाँचिएका थिए, देब्रे फोक्सो च्यातिएको थियो, श्वासनलीमा गम्भीर चोट लागेको थियो र अनुहारका साथै हाडजोर्नीमा ठुलो आघात पुगेको थियो। आइएलएस अस्पतालका विशेषज्ञ डाक्टरहरूको टोलीले ८ घण्टा लामो आकस्मिक शल्यक्रिया गरेर उनको ज्यान बचाउन सफल भएको थियो। यति ठुलो दुर्घटना र जटिल शल्यक्रियाको केही दिनमै सृष्टिले बेडबाट उठेर हिँड्न सुरु गरिन् र आफ्नो नीट परीक्षा दिने अटुट इच्छा व्यक्त गरिन्। अस्पताल प्रशासन, चिकित्सा टोली र स्थानीय नागरिक अधिकारीहरूको अभूतपूर्व समन्वयमा उनलाई कडा मेडिकल निगरानी र अक्सिजन सपोर्टका साथ परीक्षामा सामेल गराइयो, जसले उनको साहस क्लिनिकल सीमाभन्दा माथि रहेको प्रमाणित गर्यो।
​सृष्टिको उपचारमा संलग्न कन्सल्टेन्ट कार्डियोथोरासिक एन्ड भास्कुलर सर्जन डा. समर्थ आचार्यले भावुक हुँदै भन्नुभयो कि सृष्टिका नौवटा करङ भाँचिएका थिए, तर उनको आत्मबल कहिल्यै डगमगाएन। आज उनी आईसीयूबाट आफ्नो उज्ज्वल भविष्यतर्फ पाइला चाल्दै छिन् र उनले अस्पतालका डाक्टरहरूलाई हामी जीवन मात्र बचाउँदैनौँ, भविष्यको पनि रक्षा गर्छौँ भन्ने कुराको सम्झना गराएकी छिन्। त्यस्तै अस्पतालका चीफ अपरेटिङ अफिसर बैश्पायन मुखर्जीले सृष्टिको डिस्चार्जलाई एक चमत्कारिक सामूहिक प्रयासको परिणाम भन्दै गर्व व्यक्त गर्नुभयो। आज डिस्चार्ज हुँदै गर्दा सम्पूर्ण मेडिकल टोलीले सृष्टिको यो ऐतिहासिक संघर्ष र विजयलाई सम्मान गर्दै बिदाइ गरेको छ।