कर्मचारी हितका विषयमा छलफल

​गान्तोक: मुख्यमन्त्री प्रेमसिंह तामाङसँग आज ‘ऑल सिक्किम गवर्नमेंट एम्प्लाइज एसोसिएशन (ग्रुप सी एंड डी) को एक उच्चस्तरीय प्रतिनिधिमण्डलले शिष्टाचार भेटघाट गरेको छ। सङ्गठनका अध्यक्ष सोमनाथ अधिकारीको नेतृत्वमा आएको कार्यकारी सदस्यहरूको टोलीले मुख्यमन्त्रीको सरकारी निवासमा भेटेको हो।
​भेटघाटको क्रममा राज्य सरकारका कर्मचारीहरूको कल्याण, उनीहरूका आकाङ्क्षा, हकहित र विभिन्न समसामयिक विषयहरूमाझ विस्तृत एवं सकारात्मक छलफल भएको छ।
​राज्य प्रशासनलाई सुचारु र व्यवस्थित रूपमा सञ्चालन गर्न सरकारी कर्मचारीहरूले पुर्‍याएको महत्त्वपूर्ण योगदान र निष्ठापूर्ण सेवाको मुख्यमन्त्रीले उच्च प्रसंशा गर्नुभयो। कर्मचारीहरूलाई राज्य संयन्त्रको मेरुदण्डका रूपमा उल्लेख गर्दै मुख्यमन्त्री गोलेले भन्नुभयो: ​”राज्यको प्रशासनिक कार्यहरूलाई गति दिन कर्मचारी वर्गले पुर्‍याएको योगदान सराहनीय छ। सरकार सधैँ कर्मचारीहरूको पक्षमा छ र उनीहरूका हरेक न्यायोचित माग तथा समस्याहरूलाई उचित सम्बोधन गर्न पूर्ण रूपमा प्रतिबद्ध छ।”
​मुख्यमन्त्रीले सङ्गठनका प्रतिनिधिहरूलाई राज्य सरकारको तर्फबाट निरन्तर सहयोग रहने आश्वासन दिँदै भविष्यमा पनि कर्मचारी र प्रशासनबीच यस्तै सुमधुर समन्वय रहिरहने विश्वास व्यक्त गर्नुभएको छ।