मिसन सिक्किम अर्ग्यानिक्स’ र पूर्वाधार विकासमा भारत सरकारको पूर्ण सहयोग

​गान्तोक: मुख्यमन्त्री प्रेम सिंह तमांगले राज्यको प्रगति अनि सम्भावनाहरूको उच्च प्रशंसा गर्नुभएकोमा भारत सरकारका केन्द्रीय उत्तर-पूर्वी क्षेत्र विकास (डोनर) मन्त्री ज्योतिरादित्य एम. सिन्धियाप्रति हार्दिक आभार प्रकट गर्नुभएको छ। मुख्यमन्त्रीले केन्द्रीय मन्त्रीको यो सराहनाले सिक्किम र यहाँका जनताको उत्साह अझ बढाएको उल्लेख गर्नुभयो।
​विज्ञप्ति जारी गर्दै मुख्यमन्त्री तमांगले दिगो विकास, प्राङ्गारिक (अर्ग्यानिक) खेती, पर्यावरण संरक्षण र जिम्मेवार पर्यटनका क्षेत्रमा सिक्किमले हासिल गरेका उपलब्धिहरूलाई केन्द्र सरकारले दिएको मान्यता हाम्रा निम्ति प्रेरणादायी रहेको बताउनुभयो। उहाँले राज्यमा सञ्चालित ‘मिसन सिक्किम अर्ग्यानिक्स’ जस्ता रूपान्तरणकारी योजनाहरूका साथै विभिन्न पूर्वाधार र कनेक्टिभिटी (यातायात तथा सञ्चार सम्पर्क) परियोजनाहरूका लागि केन्द्रीय मन्त्री सिन्धियाले पुर्‍याउनुभएको सहयोगको सराहना गर्नुभयो। मुख्यमन्त्रीका अनुसार, यस सहयोगले सिक्किमको चौतर्फी विकास र समृद्धिका लागि केन्द्र सरकार कति प्रतिबद्ध छ भन्ने कुरा प्रस्ट पार्छ।
​सिक्किमका जनताको तर्फबाट केन्द्रीय मन्त्री सिन्धियालाई उहाँको निरन्तर मार्गदर्शन र सहयोगका निम्ति धन्यवाद दिँदै मुख्यमन्त्रीले भन्नुभयो, “हामी उत्तर-पूर्वी क्षेत्र र सिङ्गो देशकै प्रगतिमा महत्त्वपूर्ण योगदान पुर्‍याउँदै एउटा बलियो, हरित र अझ समृद्ध सिक्किम निर्माणका लागि निरन्तर प्रतिबद्ध छौँ।”