काेलकाता: ​पश्चिम बंगालमा भारतीय जनता पार्टी (भाजपा) को सरकार गठन भएपछि पहिलो पटक सोमबार मुख्यमन्त्री शुभेन्दु अधिकारीको क्याबिनेट (मन्त्रिपरिषद्) को ठूलो विस्तार भएको छ। लोकभवनमा आयोजित एक विशेष समारोहका बीच ३५ जना नयाँ मन्त्रीहरूले पद तथा गोपनीयताको शपथ लिएका छन्। राज्यपाल आर.एन. रविले सबै मन्त्रीहरूलाई शपथ गराउनुभएको हो। यस विस्तारसँगै राज्यको भाजपा सरकारमा मन्त्रीहरूको कुल संख्या ४१ पुगेको छ।
​वन्दे मातरम् र राष्ट्रिय गानका साथ सुरु भएको उक्त समारोहमा मुख्यमन्त्री शुभेन्दु अधिकारी स्वयं उपस्थित हुनुहुन्थ्यो भने मुख्य सचिव मनोज अग्रवालले नयाँ मन्त्रीहरूको नाम घोषणा गर्नुभएको थियो। समारोहमा तापस राय, मनोज उरांव, अर्जुन सिंह, गौरीशंकर घोष, दीपक बर्मन, शारद्वत मुखोपाध्याय, अरूप कुमार दास, स्वपन दासगुप्ता, कल्याण चक्रवर्ती, डा शंकर घोष र दूधकुमार मण्डलले पूर्ण मन्त्रीका रूपमा शपथ लिएका छन्। यसैगरी मालती रावा राय, राजेश महतो र इन्द्रनील खाँलाई राज्यमन्त्री (स्वतन्त्र प्रभार) को जिम्मेवारी दिइएको छ। राज्यमन्त्रीका रूपमा शपथ लिनेहरूमा अशोक डिन्डा, कौशिक चौधरी, जुएल मुर्मू, हरेकृष्ण बेरा, शन्तनु प्रमाणिक, उमेश राय, पूर्णिमा चक्रवर्ती, भास्कर भट्टाचार्य, दिवाकर घरामी, नादिया चन्द बाउरी, गर्गी दास घोष, अमिय किस्कू, कलिता माझी, बिराज विश्वास, सुमना सरकार, आनन्दमोय बर्मन, विशाल लामा र दीपङ्कर जाना लगायत रहेका छन्।
​कुन मन्त्रीलाई कुन मन्त्रालय वा विभागको जिम्मेवारी दिइनेछ भन्नेबारे अझै आधिकारिक घोषणा गरिएको छैन। सूत्रहरूका अनुसार शपथ ग्रहणलगत्तै सबै मन्त्रीहरू सिधै ‘नवान्न’ अर्थात् राज्य सचिवालय जानेछन्, जहाँ मन्त्रिपरिषद्को बैठक बस्नेछ र सोही बैठकमा मुख्यमन्त्री अधिकारीले विभागहरूको बाँडफाँड गर्न सक्ने अनुमान गरिएको छ। उक्त समारोहमा केन्द्रीय मन्त्री एवं बालुरघाटका सांसद सुकान्त मजुमदार, प्रदेश भाजपा अध्यक्ष शमिक भट्टाचार्य र मन्त्री अग्निमित्रा पालको पनि उपस्थिति रहेको थियो। यसअघि गत मे ९ मा शुभेन्दु अधिकारीले ५ जना मन्त्रीहरूसहित मुख्यमन्त्री पदको शपथ लिनुभएको थियो।