​गान्ताेक: सिक्किमका मुख्यमन्त्री प्रेमसिंह तामाङ (गोले) ले ‘मलेसिया अल्ट्रा ट्रेल बाय युटीएमबी’मा ऐतिहासिक सफलता हासिल गर्नुभएका धावक वीरबहादुर राईलाई बधाई तथा सम्मान व्यक्त गर्नुभएको छ।
​नाम्ची जिल्लाको सालघारी निवासी वीरबहादुर राईसँग मुख्यमन्त्री गोलेले आज आफ्नै सरकारी निवासमा भेटघाट गर्दै उहाँको उत्कृष्ट प्रदर्शनको प्रशंसा गर्नुभएको हो।
​वीरबहादुरले मलेसियामा आयोजित प्रतियोगिताको २५के (एमवाई२५) विधामा २ घण्टा २५ मिनेटको उत्कृष्ट समय निकाल्दै स्वर्ण जित्नुभएको थियो। यस सफलतासँगै उहाँ ‘युटीएमबी सिरिज’ को २५के विधामा पोडियम (उत्कृष्ट ३ स्थान) हासिल गर्ने पहिलो भारतीय धावक बन्नुभएको छ।
​सामाजिक सञ्जालमार्फत भेटघाटका तस्बिरहरू शेयर गर्दै मुख्यमन्त्री गोलेले भन्नुभएको छ, “वीरबहादुर राईले आफ्नो उत्कृष्ट प्रदर्शनमार्फत सम्पूर्ण सिक्किमको नाम उच्च राख्नुभएको छ। उहाँको यो ऐतिहासिक उपलब्धि र व्यावसायिक धावकका रूपमा देखाउनुभएको समर्पणले सिक्किमका धेरै युवा धावकहरूलाई उत्प्रेरित गर्नेछ।”
​मुख्यमन्त्री गोलेले उहाँको आगामी व्यावसायिक खेल यात्राको सफलताका लागि हार्दिक शुभकामना समेत व्यक्त गर्नुभएको छ।