शिक्षा, स्वास्थ्य र सेवाभावको उच्च प्रशंसा
लेह(लद्दाख): भारतका उप-राष्ट्रपतिले लद्दाखको लेहस्थित देवाचन क्याम्पसमा रहेको प्रतिष्ठित महाबोधि अन्तर्राष्ट्रिय ध्यान केन्द्र र ‘बुद्ध पार्क अफ पीस’ को भ्रमण गर्नुभएको छ। भ्रमणका क्रममा केन्द्रले सामाजिक रूपान्तरण, शिक्षा र मानवीय सेवाका क्षेत्रमा पुर्याएको योगदानको उहाँले उच्च प्रशंसा गर्नुभएको छ।
भ्रमणपश्चात् उप-राष्ट्रपतिले आफ्नो आधिकारिक सामाजिक सञ्जाल फेसबुक पेजमार्फत तस्बिरहरू सार्वजनिक गर्दै महाबोधि केन्द्रको सेवाभावप्रति गहिरो सन्तुष्टि र खुसी व्यक्त गर्नुभएको छ।
करुणा र निःस्वार्थ सेवाको अनुपम उदाहरण
उप-राष्ट्रपतिले फेसबुकमा लेख्नुभएको छ, “आज लेहको देवाचन क्याम्पसस्थित महाबोधि अन्तर्राष्ट्रिय ध्यान केन्द्र (MIMC) र बुद्ध पार्क अफ पीसको भ्रमण गर्दा लद्दाखमा शिक्षा, स्वास्थ्य सेवा, सामाजिक कल्याण, वातावरणीय दिगोपन, तथा योग र ध्यानको प्रवर्द्धनमा यस केन्द्रले पुर्याएको उल्लेखनीय योगदानबाट म निकै प्रभावित भएको छु।”
उहाँले अगाडि भन्नुभएको छ, “यस क्याम्पसको कण-कणमा व्याप्त करुणा, निःस्वार्थ सेवा, सद्भाव र समावेशी भावना साँच्चिकै प्रेरणादायी छ।”
सार्वजनिक तस्बिरहरूमा विशेष क्षण
समाजिक सञ्जालमा सेयर गरिएका तस्बिरहरूमा उप-राष्ट्रपतिलाई केन्द्रका संस्थापक पूज्य भिक्षु संघसेन र अन्य पदाधिकारीहरूले परम्परागत खादा लगाएर न्यानो स्वागत गरेको देख्न सकिन्छ। तस्बिरहरूमा उप-राष्ट्रपतिले त्यहाँ रहेका बालबालिकाहरूसँग आत्मीय कुराकानी गर्नुका साथै बुद्ध पार्क अफ पीसको शान्त वातावरणमा ध्यान केन्द्रका गतिविधिहरूको अवलोकन गरिरहनुभएको देखिन्छ।
लद्दाखको दुर्गम क्षेत्रमा शिक्षा, स्वास्थ्य र बौद्ध दर्शनको प्रवर्द्धन गर्दै विश्वमै शान्तिको सन्देश फैलाउन महाबोधि केन्द्रले लामो समयदेखि नेतृत्वदायी भूमिका निर्वाह गर्दै आएको छ, जसलाई उप-राष्ट्रपतिको यस भ्रमण र संक्षिप्त टिप्पणीले थप गरिमा प्रदान गरेको छ।
About Author
