​दार्जिलिङ: लोक निर्माण (पीडब्लुडी) तथा खानेपानी एवं स्वच्छता (पीएचई) मन्त्री डा. अजय पोद्दारको अध्यक्षतामा भारतीय जनता पार्टी (भाजपा) को महत्त्वपूर्ण सांगठनिक बैठक सम्पन्न भएको छ। बैठकका क्रममा मन्त्री डा. पोद्दारले पार्टीद्वारा सञ्चालित ‘सेवा संकल्प अभियान’ अन्तर्गत भइरहेका विविध गतिविधिहरूको समीक्षा गरे।
​बैठकलाई सम्बोधन गर्दै मन्त्री डा. पोद्दारले सार्वजनिक जीवनमा प्रत्येक कार्यकर्ताको भूमिका महत्त्वपूर्ण हुने बताए। उनले सबै कार्यकर्तालाई निस्वार्थ भावनाले जनताको सेवामा खटिन आग्रह गरे। कार्यकर्ताहरू जनता र सरकारबीचको पुलका रूपमा काम गर्नुपर्ने बताउँदै उनले सर्वसाधारणका समस्या सरकारसम्म पुर्याउन र सरकारी योजनाका लाभहरू जनतासम्म पुर्याउन जोड दिए।
​मन्त्री डा. पोद्दारले क्षेत्रको द्रुत विकास र भ्रष्टाचारमुक्त पहाड निर्माणका लागि सबैलाई एकजुट हुन आह्वान गरे। जनताको विश्वास नै पार्टीको वास्तविक शक्ति भएको र त्यो इमानदार काम तथा सेवाबाट मात्रै प्राप्त हुने उनले उल्लेख गरे।
​प्रधानमन्त्री नरेन्द्र मोदी र मुख्यमन्त्री शुभेन्दु अधिकारीको नेतृत्वमा भाजपा सरकार विकास, पारदर्शी शासन र जनसेवाप्रति प्रतिबद्ध रहेको बताउँदै बैठकले यो सन्देश दार्जिलिङ पहाड, तराई र डुवर्सका प्रत्येक वार्ड अनि गाउँ-गाउँसम्म पुर्याउने निर्णय गरेको छ।