​कोलकाता: पश्चिम बंगालको स्वास्थ्य क्षेत्रमा ठूलो निजी लगानी भित्रिने भएको छ। मुख्यमन्त्री शुभेंदु अधिकारीले अडानी समूहले राज्यको न्यु टाउनमा २ हजार बेडको अत्याधुनिक अस्पताल स्थापना गर्न लागेको घोषणा गरेका छन्। शनिबार भवानीपुरमा आयोजित नागरिक समाज र उद्योग जगतका प्रतिनिधिहरूसँगको संवाद कार्यक्रममा उनले यस परियोजनाका लागि अडानी समूहले लिखित प्रतिबद्धता दिइसकेको जानकारी दिए। प्रस्तावित अत्याधुनिक अस्पतालमा विपन्न तथा गरिब बिरामीहरूका लागि १ हजार बेड आरक्षित रहनेछन् भने बाँकी १ हजार बेड व्यावसायिक रूपमा सञ्चालन गरिने मुख्यमन्त्रीले बताए। राज्यमा नयाँ सरकार गठन भएसँगै लगानी र उद्योग प्रवर्द्धनलाई प्राथमिकतामा राखिएको उल्लेख गर्दै उनले ठोस प्रस्ताव लिएर आउने उद्योगीहरूलाई जमिन, सिङ्गल विन्डो प्रणाली र अन्य आवश्यक सुविधा उपलब्ध गराउन सरकार तयार रहेको स्पष्ट पारे।
​मुख्यमन्त्री अधिकारीले उद्योग र लगानी भित्र्याउनका लागि बलियो कानुन व्यवस्था र सुरक्षित वातावरण सबैभन्दा महत्त्वपूर्ण सर्त भएको बताए। औद्योगिक कामकाजमा हुने कुनै पनि किसिमका असामाजिक बाधा वा अवरोधलाई सरकारले कडा रूपमा दमन गर्ने र लगानीकर्ताहरूलाई पूर्ण सुरक्षा दिने उनले आश्वासन दिए। यसै क्रममा पूर्ववर्ती सरकारमाथि प्रहार गर्दै उनले विगतको शासनकालमा उद्योगमैत्री वातावरण नहुँदा अपेक्षित लगानी आउन नसकेको आरोप लगाए। पहिलेका व्यापार सम्मेलनहरूमा ठूला-ठूला लगानीका सम्झौता घोषणा भए पनि वास्तविक धरातलमा भने निकै कम लगानी पुगेको उनको दाबी थियो। राज्यमा ऋणको ठूलो भार र सामाजिक सुरक्षा योजनाहरूको दायित्व भए तापनि वर्तमान सरकारले बजेटमार्फत उद्योगहरूका लागि भूमि आवंटन, सिङ्गल विन्डो प्रणाली र १०० करोड भारु भन्दा बढी लगानी गर्ने उद्योगहरूलाई अनुमति पत्र सम्बन्धी विशेष सुविधाहरू ल्याएको उल्लेख गर्दै उनले आगामी बजेटमा लगानीकर्ताहरूका लागि थप सहुलियत थप गर्ने योजना बनाएको समेत बताए।