भाजपा सिक्किमद्वारा बधाई व्यक्त

​गान्तोक: भारत सरकारको संस्कृति मन्त्रालयले भारतीय जनता पार्टी (भाजपा) पाक्योङ जिल्लाका अध्यक्ष प्रेम क्षेत्री खतिवडालाई डिमापुरस्थित उत्तर पूर्व क्षेत्र सांस्कृतिक केन्द्र (एनईजेडसीसी) को बोर्ड अफ गभर्नर्सको सदस्यमा मनोनित गरेको छ। यस प्रतिष्ठित पदमा मनोनित भएकोमा भाजपा सिक्किम राज्य कमिटीले खतिवडालाई हार्दिक बधाई तथा शुभकामना व्यक्त गरेको छ। आफ्नो आधिकारिक सामाजिक सञ्जाल फेसबुक पेज मार्फत एक बधाई सन्देश जारी गर्दै भाजपाले खतिवडाको यो मनोनयन उनको अथक योगदानको सही कदर भएको उल्लेख गरेको छ।
​विगत दुई दशकदेखि सिक्किमको नेपाली भाषा, सङ्गीत, कला र समृद्ध सांस्कृतिक सम्पदाको संरक्षण एवं संवर्द्धनमा प्रेम क्षेत्री खतिवडाले पुर्‍याएको विशिष्ट योगदानका कारण उनले यो प्रतिष्ठित जिम्मेवारी प्राप्त गरेका हुन्। कला र संस्कृतिप्रतिको उनको समर्पण, प्रतिबद्धता र कलात्मक उत्कृष्टताले गर्दा उनले सम्पूर्ण क्षेत्रमा नै आफ्नो एउटा छुट्टै पहिचान बनाउन सफल भएका छन्।
​एनईजेडसीसी जस्तो प्रतिष्ठित राष्ट्रिय मञ्चमा खतिवडाको उपस्थितिले सिक्किमको समृद्ध सांस्कृतिक पहिचानलाई अझ बलियो बनाउनुका साथै उत्तर-पूर्वी राज्यहरूको विविध परम्परालाई राष्ट्रिय स्तरमा प्रवर्द्धन गर्न महत्त्वपूर्ण भूमिका खेल्ने विश्वास भाजपाले व्यक्त गरेको छ। खतिवडाले यस गरिमामय पदमा रहेर सिक्किमको उत्कृष्ट प्रतिनिधित्व गर्नेमा पार्टी पूर्ण रूपमा विश्वस्त रहेको सन्देशमा उल्लेख छ। सिङ्गो भाजपा सिक्किम परिवारले उनको सफल कार्यकालको कामना गर्दै समाज, संस्कृति र राष्ट्रको सेवामा उनी निरन्तर अगाडि बढिरहून् भनी प्रार्थना समेत गरेको छ।