दिगो विकास र लगानीमा जोड

​सिलगढी: पश्चिम बंगालको पर्यटन क्षेत्रको भविष्य र विशेष गरी उत्तर बंगाल क्षेत्रको विकासका लागि सिलगढीमा पर्यटन सरोकारवालाहरूको एक बृहत् अन्तरक्रियात्मक बैठक सम्पन्न भएको छ। दार्जिलिङ, तराई र डुवर्स क्षेत्रका पर्यटन व्यवसायी तथा सरोकारवालाहरूको बाक्लो उपस्थिति रहेको उक्त बैठकमा राज्यको पर्यटन क्षेत्रलाई बलियो बनाउनेबारे गहन छलफल भएको छ।
​बैठकमा मुख्यमन्त्री शुभेन्दु अधिकारीको नेतृत्वमा राज्य सरकारले तय गरेको पर्यटन क्षेत्रको दूरदृष्टि (भिजन) र मार्गचित्र (रोडम्याप) बारे विस्तृत जानकारी गराइयो। सरकारले पर्यटन पूर्वाधारको विकास गर्ने, नयाँ उदीयमान गन्तव्यहरूको प्रवर्द्धन गर्ने, व्यावसायिक सहजता (ईज अफ डुइङ बिजनेस) मा सुधार ल्याउने, निजी लगानीलाई प्रोत्साहन गर्ने तथा राज्यभर दिगो पर्यटनका प्रयासहरूलाई अघि बढाउने प्रतिबद्धता जनाएको छ।
​कार्यक्रममा बोल्दै दार्जिलिङका सांसद राजु विष्टले पश्चिम बंगाल भारतकै एक प्रमुख पर्यटकीय गन्तव्यको रूपमा प्रचुर सम्भावना बोकेको क्षेत्र भएको उल्लेख गर्दै अहिले पर्यटन क्षेत्रमा गरिने लगानीले आगामी दिनमा ठुलो प्रतिफल दिने दाबी गरे। उनले पर्यटन उद्यमी र लगानीकर्ताहरूलाई उत्तर बंगाल क्षेत्रमा रहेका अवसरहरूको भरपूर फाइदा उठाउन आग्रह गर्दै नीतिगत सहयोगमार्फत लगानीमैत्री वातावरण बनाउन सरकार प्रतिबद्ध रहेको बताए।
​बैठकमा सहभागी पर्यटन क्षेत्रका प्रतिनिधिहरूले यस क्षेत्रका मुख्य चुनौती, समस्या र आगामी सुधारका लागि चाल्नुपर्ने कदमबारे आफ्ना सुझाव र सिफारिसहरू प्रस्तुत गरेका थिए।
​उक्त महत्त्वपूर्ण बैठकमा पश्चिम बंगाल सरकारका पर्यटन मन्त्री डा. शङ्कर घोष र एमएसएमई मन्त्री अशोक डिन्डाको विशेष उपस्थिति रहेको थियो। कार्यक्रममा पर्यटन विभागका सचिव, अतिरिक्त सचिव, पर्यटन निर्देशक लगायत वरिष्ठ सरकारी अधिकारीहरू तथा ठुलो सङ्ख्यामा पर्यटन उद्योगका सरोकारवालाहरूको सहभागिता रहेको थियो।