न्यूयोर्क: स्विट्जरल्याण्डका दिग्गज रोजर फेडररले पेशादार टेनिसबाट सन्न्यास लिइसकेको भए पनि मंगलवार राति प्रशंसकहरूले न्यूयोर्कको आर्थर ऐश स्टेडियममा केही समयको निम्ति उनलाई पुरानो रंगमा देख्ने मौका पाए। पाँचपल्टका यूएस ओपन च्याम्पियन फेडररले आफ्नो पुरानो प्रतिद्वन्द्वी अमेरिकाका एण्डी रडिकलाई प्रदर्शनी म्याचमा ६-३-ले पराजित गरी आफ्नो स्वर्णिम दिनहरूको यादहरू ताजा गरे। ४५ वर्षीय फेडररले २०१९ पछि पहिलोपल्ट आर्थर ऐश स्टेडियमको कोर्टमा कदम राखे। उनको स्वागत कुनै वर्तमान च्याम्पियन भन्दा कम्ती थिएन। स्टेडियममा हजारौंको संख्यामा उपस्थित दर्शकहरूले स्विस् दिग्गजलाई भव्य स्वागत जनाए। फेडररले पनि प्रशंसकहरूलाई निराश गरेनन्। केवल ३५ मिनटसम्म चलेको एक सेटको यस प्रदर्शनी म्याचमा उनले रोडिकलाई ६-३-ले पराजित गरे। यो केवल एउटा प्रदर्शनी म्याच थियो अनि यसमा कुनै ऱ्याङकिंग या ग्राण्ड स्ल्याम खिताबको दबाउ थिएन तर फेडररले आफ्नो खेलद्वारा यस म्याचलाई खास बनाए। फेडररले दोस्रो गेममै ब्याकह्याण्ड विनर लगाएर आफ्नो पुरानो लयको झलक देखाए। त्यसपछि उनले असाधारण पासिंग शट्सद्वारा दर्शकहरूलाई धेरैपल्ट आफ्नो सीटबाट उठ्न वाध्य गरे। छैटौं गेममा उनको असाधारण ब्याकह्याण्ड पासिंग शट् देखेर दर्शकहरूले ताली बजाएर स्टेडियम थर्काए। रडिकले आफ्नो चर्चित तेज सर्विसको साथ म्याचलाई प्रतिस्पर्धी बनाउने प्रया गरे तर फेडररले लगातार दबाउ बनाएर जीत हासिल गरे। पुरुष एकल म्याचमा जीत हासिल गरेको केही समयपछि फेडरर युगल म्याच खेल्न पनि ओर्लिए। युगलमा फेडरर र महान खेलाड़ी जन म्याकनरोले जोड़ी बनाएका थिए। यसरी प्रतिद्वन्द्वी जोड़ीको रूपमा रडिक र अमेरिकी दिग्गज आन्द्रे आगासी रहेका थिए। पुरुष युगल म्याचमा पनि फेडरर र म्याकनरोको जोड़ीले ७-५-ले जीत हासिल गऱ्यो।
फेडररको निम्ति यो मौका भावुक थियो कारण आर्थर ऐश उनको करियरको सबैभन्दा खास कोर्टहरूमा एउटा रहेको छ। उनले २००४-देखि २००८-सम्म लगातार ५ पल्ट यूएस ओपनको खिताब जितेका थिए। न्यूयोर्कको यस कोर्टमा उनले आफ्नो करियरको धेरै यादगार अध्याय लेखेका छन्। फेडररले भने, न्यूयोर्कमा फर्किएर राम्रो लागिरहेको छ। यस कोर्ट, यहाँका प्रशंसकहरू र यस शहरसँग मेरो अविश्वसनीय यादहरू जोड़िएको छ। यस अवसरमा कोर्टमा फेडररकी पत्नी मिर्कासहित पूरा परिवार उपस्थित थियो। फेडरर र रडिकबीच पेशादार करियरमा २४ वटा म्याच खेलिएको छ, जसमा २१ पल्ट स्विस् दिग्गजले जीत हासिल गरेका छन्। यी दुईबीच ४ वटा ग्राण्ड स्ल्याम फाइनलमा भिड़न्त भएको थियो। साल २००६ र २००७-को यूएस ओपन फाइनलमा फेडररले रडिकलाई पराजित गरी खिताब जितेका थिए। कोर्टमा प्रतिद्वन्द्विता चरममा रहे पनि यी दुईबीच मित्रता पनि गहिरो रहेको छ। रडिकले भने, यो रोजरले गर्दा नै सम्भव भयो। हामीले धेरै म्याचहरू खेल्यौं अनि उनले मलाई धेरैपल्ट पराजित गरे तर आफ्नो करियरको अवधि हामीले मित्रता कायम राख्यौं। त्यो मित्रता आज पनि कायम छ अनि सदा रहनेछ।