‎सिलगढी: कूडो अन्तर्राष्ट्रिय महासंघ भारतको आयोजनामा महाराष्ट्रको पुणेमा चौथो राष्ट्रिय कूडो च्याम्पियनसिप आयोजना हुने भएको छ। यस प्रतियोगितामा देशका विभिन्न राज्यका युवा खेलाडीहरूले सहभागिता जनाउनेछन्।
‎पश्चिम बंगालको २३ सदस्यीय टोलीमा दार्जिलिङ जिल्लाकी इशिका राय र सिन्झा भट्टाचार्यले राज्यको प्रतिनिधित्व गर्नेछन्। दुवै खेलाडीले प्रतियोगितामा उत्कृष्ट प्रदर्शन गर्दै बंगालको नाम उजागर गर्ने लक्ष्यसहित तयारी गरेका छन्।
‎प्रतियोगिताअघि दुवै खेलाडीले कठोर प्रशिक्षण पूरा गरेका छन्। उनीहरूको अन्तिम तयारीको निरीक्षण प्रशिक्षक अंकुर बर्मनले गरेका थिए, जसले खेलाडीहरूको प्राविधिक क्षमतालाई अझ सुदृढ बनाउन जोड दिएका छन्।
‎प्रशिक्षकका अनुसार कूडो मार्शल आर्ट आत्मरक्षाका लागि अत्यन्त महत्वपूर्ण छ र भविष्यमा यसबाट सरकारी लाभसहित विभिन्न अवसर प्राप्त हुन सक्छन्। उनले दुवै खेलाडीको प्रदर्शनप्रति विश्वास व्यक्त गरेका छन्।
‎यस प्रतियोगिताका विजेताहरूले आगामी १८औँ अन्तर्राष्ट्रिय कूडो च्याम्पियनसिपमा सहभागिता जनाउने अवसर प्राप्त गर्नेछन्।