मन्त्री विशाल लामाद्वारा योगदानको स्मरण

​जयगाउँ: पादरी गङ्गा प्रसाद प्रधानको १७५औँ जयन्तीको पावन अवसरमा शनिबार एक विशेष कार्यक्रमको आयोजना गरियो। यस गरिमामय ऐतिहासिक कार्यक्रममा पश्चिम बङ्गाल सरकारका मन्त्री विशाल लामा मुख्य अतिथिका रूपमा सहभागी हुनुभएको थियो। युनाइटेड क्रिस्चियन फोरम, जयगाउँको तत्वावधानमा सम्पन्न भएको यस कार्यक्रममा मन्त्री लामाले निमन्त्रणाका लागि आयोजक टोली तथा सम्पूर्ण पदाधिकारीहरू प्रति हार्दिक आभार व्यक्त गर्नुभयो। कार्यक्रममा उपस्थित सम्पूर्ण मानिसहरूसँग आत्मीय भेटघाट गर्दै उहाँले पादरी गङ्गा प्रसाद प्रधानले समाजका लागि गर्नुभएका कार्यहरूको चर्चा गर्नुभयो।
​मन्त्री लामाले पादरी गङ्गा प्रसाद प्रधानले समाज, शिक्षा, भाषा र आध्यात्मिक क्षेत्रमा पुर्‍याउनुभएको अतुलनीय योगदानलाई श्रद्धापूर्वक स्मरण गर्नुभयो। उहाँले यस ऐतिहासिक अवसरमा मुख्य अतिथिको रूपमा भाग लिन पाउनु आफ्नो लागि अत्यन्त गौरवको विषय रहेको बताउनुभयो।
कार्यक्रमको अन्त्यमा मन्त्री लामाले ईश्वर (प्रभु) सँग त्यहाँ उपस्थित सम्पूर्ण मानिसहरू, आयोजक टोली र समग्र समाजमाथि आफ्नो असीम कृपा, प्रेम र आशिष् सधैँ बनाइराख्न प्रार्थना गर्नुभयो र ‘जय मसीह’ भन्दै सबैको अभिवादन गर्नुभयो।