अन्तिम ओभरमा ३३८ रनको लक्ष्य पूरा, मोहित उल्वाको विस्फोटक ब्याटिङ

अल अमेरात(ओमान): रोमाञ्चक प्रतिस्पर्धाले भरिएको फाइनल खेलमा पाकिस्तानलाई एक विकेटले पराजित गर्दै भारतले सन् २०२६ को एसीसी पुरुष यू-१९ एसिया कप क्रिकेटको उपाधि आफ्नो पोल्टामा पारेको छ। शनिबार अल अमेरात क्रिकेट मैदानमा सम्पन्न फाइनलमा भारतले ३३८ रनको विशाल लक्ष्य अन्तिम ओभरमा नौ विकेट गुमाएर पूरा गरेको हो।
भारतको जितमा मोहित उल्वा नायक बने। कठिन परिस्थितिमा आक्रामक ब्याटिङ गरेका उनले मात्र २६ बलमा पाँच चौका र तीन छक्काको मद्दतले अविजित ४९ रन बनाए। अन्तिमसम्म क्रिजमा टिकेका उनलाई चिगुरुपति वेंकटले आठ बलमा नटआउट ११ रन बनाउँदै साथ दिए। यी दुईको संयमित साझेदारीले भारतलाई ऐतिहासिक जित दिलायो।
यसअघि टस जितेर पहिले ब्याटिङ गरेको पाकिस्तानले निर्धारित ५० ओभरमा नौ विकेटको क्षतिमा ३३७ रनको बलियो योगफल तयार गरेको थियो। पाकिस्तानका उस्मान खानले उत्कृष्ट प्रदर्शन गर्दै १११ बलमा ११ चौका र तीन छक्कासहित १०७ रनको शतकीय पारी खेले। त्यस्तै अब्दुल कादिरले ५४ बलमा आठ छक्का र तीन चौकाको मद्दतले ८० रन बनाए।

पाकिस्तानी टोलीका कप्तान फरहान युसुफले ६० बलमा ६३ रन जोड्दा अहमद हुसेनले १७ रनको योगदान दिए। भारतीय बलिङतर्फ काव्या पटेल सर्वाधिक सफल रहे। उनले ६८ रन खर्चेर चार विकेट लिए भने चिगुरुपति वेंकटले तीन विकेट हात पारे।
३३८ रनको लक्ष्य पछ्याएको भारतले सुरुदेखि नै आक्रामक ब्याटिङ गर्दै खेलमा आफ्नो पकड बनाउने प्रयास गरेको थियो। कप्तान लक्ष्य राजेश रायचन्दानीले १०१ बलमा ८० रन बनाउँदै इनिङ्स सम्हाले। आर्यवीर सहवागले ६१ बलमा ५८ रनको महत्त्वपूर्ण योगदान दिए। त्यसैगरी मनल चौहानले केवल ३२ बलमा ४७ रन बनाउँदै भारतीय टोलीको जितको सम्भावना बलियो बनाए।
तर, भारतीय ब्याट्सम्यानहरू नियमित अन्तरालमा आउट हुन थालेपछि खेल पाकिस्तानको पक्षमा जाने सङ्केत देखिएको थियो। अन्तिम चरणमा भारतीय टोलीमाथि दबाब बढ्दै गएको अवस्थामा मोहित उल्वाले आक्रामक ब्याटिङ गर्दै खेलको समीकरण परिवर्तन गरे। उनको अविजित ४९ रन र वेंकटको साथले भारतलाई लक्ष्यसम्म पुर्‍यायो।
पाकिस्तानका बलरमध्ये रिजवानुल्लाहले तीन विकेट लिए भने निकाब शफिकले दुई विकेट हात पारे। यद्यपि, अन्तिमसम्म भारतीय ब्याट्सम्यानलाई रोक्न पाकिस्तान सफल हुन सकेन।
यस जितसँगै भारतीय युवा टोलीले कठिन परिस्थितिमा धैर्य र आत्मविश्वासका साथ खेल्दै यू-१९ एसिया कपको उपाधि जितेको छ। अन्तिम ओभरसम्म चलेको रोमाञ्चक फाइनलले प्रतियोगितालाई अविस्मरणीय बनाएको छ।