राष्ट्रिय शिक्षा नीति पूर्ण रूपमा लागू गर्ने दृढता

​कोलकाता: पश्चिम बङ्गालको समग्र शैक्षिक परिदृश्यलाई सुदृढ बनाउने र विद्यार्थीहरूको चौतर्फी विकास सुनिश्चित गर्ने उद्देश्यले राज्यका मुख्यमन्त्री शुभेन्दु अधिकारी र केन्द्रीय शिक्षा राज्यमन्त्री डा. सुकान्त मजमदारको अध्यक्षतामा एक उच्चस्तरीय समीक्षा बैठक सम्पन्न भएको छ। कोलकातामा आयोजित उक्त महत्त्वपूर्ण बैठकमा राज्यका उच्च तथा विद्यालय शिक्षा मन्त्रीहरू, केन्द्रीय शिक्षा मन्त्रालयका वरिष्ठ अधिकारीहरू र पश्चिम बङ्गाल सरकारको शिक्षा विभागका प्रतिनिधिहरूको उल्लेखनीय उपस्थिति रहेको थियो। बैठकमा राज्यको वर्तमान शैक्षिक अवस्था, पूर्वाधार विकास र सुधारका विभिन्न पाटाहरूमाथि गहन छलफल गरिएको थियो।
​यस बैठकको सबैभन्दा महत्त्वपूर्ण उपलब्धिका रूपमा पश्चिम बङ्गाल सरकारले राज्यको शैक्षिक विकासका लागि राष्ट्रिय शिक्षा नीति (एनईपी २०२०) का प्रावधानहरूलाई पूर्ण रूपमा लागू गर्ने आफ्नो संकल्पलाई दोहोऱ्याएको छ।

यसअघि नीतिगत असहमतिका कारण रोकिएका विभिन्न केन्द्रीय योजना र अनुदानहरूलाई अब राज्यका विद्यालय र विश्वविद्यालयहरूको हितका लागि द्रुत गतिमा अघि बढाइने सहमति भएको छ। यसका साथै, विद्यालयहरूमा गुणस्तरीय शिक्षाको पहुँच पुऱ्याउन र आधुनिक शिक्षण प्रणाली भित्र्याउन केन्द्र र राज्य सरकारले आपसी समन्वयमा काम गर्ने प्रतिबद्धता जनाएका छन्।
​बैठकमा प्राथमिक तथा माध्यमिक विद्यालयहरूको पूर्वाधार सुधार, शिक्षकहरूको रिक्त दरबन्दी पूर्ति र डिजिटल शिक्षाको विस्तारबारे पनि गम्भीर विमर्श भएको थियो। मुख्यमन्त्री अधिकारीले राज्यका विपन्न तथा ग्रामीण क्षेत्रका विद्यार्थीहरूलाई गुणस्तरीय शिक्षा प्रदान गर्नु सरकारको पहिलो प्राथमिकता भएको उल्लेख गर्दै केन्द्रीय योजनाहरूको प्रभावकारी कार्यान्वयनमा जोड दिनुभयो। यसैगरी केन्द्रीय राज्यमन्त्री मजमदारले पश्चिम बङ्गालको शैक्षिक स्तरलाई राष्ट्रिय मूलधारमा ल्याउन केन्द्र सरकारले आवश्यक सबै किसिमको प्राविधिक तथा वित्तीय सहयोग उपलब्ध गराउने आश्वासन दिनुभयो। यस ऐतिहासिक साझेदारीले राज्यको शिक्षा क्षेत्रमा नयाँ आयाम थप्ने विश्वास लिइएको छ।