​काठमाडौं: नेपाल सरकारले वैदेशिक रोजगारीका लागि मध्यपूर्वका देशहरूमा जान चाहने आफ्ना नागरिकहरूका लागि श्रम स्वीकृति (परमिट) जारी गर्ने प्रक्रिया पुनः सुरु गरेको छ। मध्यपूर्वमा जारी युद्ध र तनावका कारण विगत ६ महिनादेखि रोकिएको यो प्रक्रिया मंगलबारदेखि विधिवत रूपमा सुचारु गरिएको हो।
​श्रम मन्त्रालयका प्रवक्ता पीताम्बर घिमिरेका अनुसार परराष्ट्र मन्त्रालयको परामर्श र कामदारहरूको बढ्दो मागलाई ध्यानमा राखेर सरकारले परमिट जारी गर्ने निर्णय लिएको हो। यसअघि २८ फेब्रुअरीमा अमेरिका र इजरायलले इरानमाथि आक्रमण गरेपछि सुरक्षा संवेदनशीलतालाई मध्यनजर गर्दै नेपाल सरकारले चैत १ गतेदेखि खाडी मुलुकका लागि वर्क परमिट रोकेको थियो।
​वैदेशिक रोजगारीमा जाने कुल नेपाली कामदारमध्ये करिब ७५ प्रतिशत मध्यपूर्वका देशहरूमा कार्यरत छन्। विशेषगरी निर्माण क्षेत्रमा कार्यरत यी कामदारहरूले पठाउने रेमिट्यान्स नेपालको ४२ अर्ब डलरको अर्थतन्त्रको एक चौथाइभन्दा बढी हिस्सा ओगटेको छ। विश्व बैंकको तथ्यांकअनुसार ३ करोड जनसंख्या भएको नेपालमा युवा बेरोजगारी दर २०.६ प्रतिशत पुगेको छ, जुन दक्षिण एसियामै उच्च हो। स्वदेशमा रोजगारीको अभावका कारण दैनिक करिब १५ सय युवाहरू रोजगारीको खोजीमा विदेशिने गरेका छन्। सरकारको यो नयाँ निर्णयले रोजगारीको पर्खाइमा रहेका हजारौँ युवाहरूलाई राहत पुग्ने अपेक्षा गरिएको छ।