​कोलकाता: महानगरको प्रमुख सरकारी अस्पताल एसएसकेएम (SSKM) ले बिरामीहरूका लागि ठूलो राहतको घोषणा गर्दै स्वास्थ्य बीमा अन्तर्गत ‘क्यासलेस’ उपचार सेवा सुरु गरेको छ। अस्पतालको ऐतिहासिक वुडबर्न वार्ड र हालै सञ्चालनमा आएको अनन्या युनिट (वुडबर्न–२) मा यो व्यवस्था लागू गरिएको हो। यस पहलबाट लाखौँ बीमाधारकहरूले अब उपचारका क्रममा तत्काल नगद भुक्तानी गर्नुपर्ने झन्झटबाट मुक्ति पाउनेछन्। अस्पताल प्रशासनले ‘जनरल इन्स्योरेन्स’ नेटवर्कका चार प्रमुख बीमा कम्पनीहरूसँग सम्झौता गरिसकेको छ, जसका कारण यी दुई वार्डका करिब १५० बेडमा भर्ना हुने बिरामीले विना कुनै अग्रिम भुक्तानी उपचार पाउनेछन्।
​सरकारी क्षेत्रमा पहिलो पटक पूर्ण क्यासलेस सुविधा सुरु गरिएको दाबी गर्दै अस्पतालका अधिकारीहरूले यसअघि यहाँ खर्च भएको रकम पछि फिर्ता पाउने (रिइम्बर्समेन्ट) व्यवस्था मात्र रहेको बताएका छन्। सरकारी अस्पताल भए पनि यहाँको उपचार खर्च निजी अस्पतालको तुलनामा ५० देखि ७५ प्रतिशतसम्म सस्तो रहेको डाक्टरहरूको भनाइ छ। अस्पतालले विभिन्न शल्यक्रिया र उपचारका लागि १५० भन्दा बढी प्याकेजहरू तयार गरेको छ। जसमा बेड चार्ज, जाँच, चिकित्सकको शुल्क र अपरेशन थिएटरको खर्च समेत समावेश गरिएको छ। यो कदमले सरकारी स्वास्थ्य सेवाप्रति जनताको विश्वास बढाउनुका साथै आर्थिक भार कम गर्ने विश्वास लिइएको छ।