स्थिति नियन्त्रणमा रहेको जलशक्ति मन्त्री सीआर पाटिलको दाबी
नयाँ दिल्ली: चीन-नेपाल सीमा क्षेत्रमा बादल फुटेका (क्लाउड बर्स्ट) कारण त्रिशूली र गण्डक नदीमा जलस्तर ह्वात्तै बढेपछि नेपाल र भारतका सीमावर्ती क्षेत्रहरूमा उच्च सतर्कता अपनाइएको छ। नेपालमा अचानक आएको भीषण बाढीको प्रभाव स्वरूप पानी गण्डक नदी हुँदै भारतको बिहार राज्यतर्फ बग्न थालेको छ।
भारतीय केन्द्रीय जलशक्ति मन्त्री सीआर पाटिलले नेपालमा जलस्तर १२ मिटरभन्दा बढी बढेकाले स्थिति चुनौतीपूर्ण बने पनि भारततर्फ अवस्था पूर्ण रूपमा नियन्त्रणमा रहेको जानकारी दिएका छन्। सम्भावित क्षतिलाई कम भन्दा कम गराउन नदी किनारका बस्तीहरूबाट मानिसहरूलाई सुरक्षित स्थानमा स्थानान्तरण गरिएको छ।
नेपालमा बाढीले भारी क्षति पुर्याएपछि भारतीय प्रधानमन्त्री नरेन्द्र मोदी र गृहमन्त्री अमित शाहले अवस्थाको निरन्तर अनुगमन गरिरहेका छन्। बिहारका मुख्य सचिवले सबै जिल्लाका कलेक्टरहरूसँग आपत्कालीन बैठक गरी सतर्क रहन निर्देशन दिइसकेका छन् भने विपद् व्यवस्थापनका लागि राष्ट्रिय विपद् प्रतिक्रिया बल (NDRF) का टोलीहरूलाई पनि उच्च सतर्कताका साथ परिचालन गरिएको छ।
About Author
