​नाम्ची: सिक्किमको नाम्ची जिल्लास्थित प्रसिद्ध ङादाक थुप्तेन सेडुप धार्गे चोइलिङ गुम्बामा मंगलबार एक बृहत् स्वैच्छिक रक्तदान शिविर सफलतापूर्वक सम्पन्न भएको छ। नाम्ची जिल्ला अल सिक्किम भुटिया एसोसिएसन र ङादाक गुम्बा व्यवस्थापन समितिको संयुक्त आयोजना तथा जिल्ला अस्पताल नाम्चीको रक्तसञ्चार केन्द्रको प्राविधिक सहयोगमा शिविर सञ्चालन गरिएको हो। समाज सेवा र मानवीय भावनालाई प्रवर्द्धन गर्दै बिरामीहरूका लागि सुरक्षित र पर्याप्त रगतको उपलब्धता सुनिश्चित गर्ने उद्देश्यले आयोजित शिविरमा स्थानीय लामा (भिक्षु) हरूदेखि भारतीय रिजर्भ बटालियन (आईआरबी) का जवानहरू र सर्वसाधारण गरी ९० भन्दा बढीले स्वैच्छिक रक्तदान गरेका थिए।
​शिविरको अवलोकनका लागि नाम्ची-सिङ्गीथाङ क्षेत्रका विधायक सतिशचन्द्र राई, पञ्चायती राज विभागकी सल्लाहकार रामा तामाङ, नाम्ची नगरपरिषद् (एनएमसी) का काउन्सिलरहरू ममता कालकोटे र साङ्गे भुटिया लगायतका स्थानीय जनप्रतिनिधिहरूको बाक्लो उपस्थिति रहेको थियो। यसैगरी अल सिक्किम भुटिया एसोसिएसन (नाम्ची जिल्ला) का अध्यक्ष साम्तेन भुटिया र गुम्बा व्यवस्थापन समितिका महासचिव तेन्सुङ भुटिया लगायत जुम्बोला स्वयं सहायता समूहका सदस्यहरूको पनि कार्यक्रममा सक्रिय सहभागिता थियो। सञ्चारकर्मीहरूसँग कुरा गर्दै विधायक राईले आयोजक टोलीको प्रशंसा गर्दै युवा पुस्तालाई रक्तदान जस्तो पवित्र कार्यमा अझ बढी सक्रिय हुन आग्रह गरे। एक युनिट रगतले धेरैको ज्यान जोगाउन सक्ने भन्दै उनले यसलाई नियमित सामाजिक दायित्वका रूपमा लिन सबैलाई अपिल गरे।

​वरिष्ठ रक्त केन्द्र अधिकारी डा. दिचेन ओ. भुटियाको नेतृत्वमा आएको चिकित्सक टोलीले रक्तदाताहरूको नि:शुल्क स्वास्थ्य परीक्षण गर्नुका साथै डा. मिक्मा शेर्पाको रेखदेखमा नि:शुल्क औषधि समेत वितरण गरेको थियो। रक्तदान अभियानलाई थप प्रोत्साहित गर्नका लागि पहिलोपटक रक्तदान गर्ने युवाहरूलाई जिल्ला अस्पतालका तर्फबाट विशेष टिसर्ट प्रदान गरिएको थियो भने सम्पूर्ण रक्तदाताहरूलाई कदरस्वरूप प्रमाणपत्र वितरण गरिएको थियो।