​सिलगढी: सिलगढी पुलिसले साढे पाँच वर्ष पुरानो एक यौन उत्पीडनको मुद्दामा पीडित नाबालिकालाई न्याय दिलाउन सफल भएको छ। सन् २०२० को अगस्त १ मा एक नाबालिकामाथि यौनजन्य हिंसा गरेको आरोपमा वैद्य चक्रवर्तीविरुद्ध नयाँ जलपाईगुडी थानामा (मुद्दा नम्बर ९२२/२०) ‘पोक्सो’ ऐनअन्तर्गत मुद्दा दर्ता गरिएको थियो।
​मामिलाका अनुसन्धान अधिकारी, सव-इन्स्पेक्टर (एसआई) परेश बर्मनले तदारुकताका साथ छानबिन अघि बढाउँदै आरोपीलाई पक्राउ गरेका थिए। प्रहरीले कानुनी रूपमा तोकिएको समयसीमाभित्रै अदालतसमक्ष आरोपपत्र (चार्जसिट) समेत पेस गरेको थियो।
​यसै साता (जुन २४, २०२६ का दिन) जलपाईगुडीको दोस्रो अदालतका अतिरिक्त जिल्ला तथा सत्र न्यायाधीश (जसलाई पोक्सो ऐनअन्तर्गत विशेष अदालत तोकिएको छ) ले उक्त मामिलामा अन्तिम फैसला सुनाएका हुन्। अदालतले अभियुक्त वैद्य चक्रवर्तीलाई दोषी ठहर गर्दै पोक्सो ऐनको धारा ४ अन्तर्गत २२ वर्षको कठोर कारावासको सजाय सुनाएको छ।
​यसका साथै दोषीलाई २० हजार भारतीय रुपैयाँ जरिवाना समेत तोकिएको छ। जरिवाना बापतको रकम भुक्तान नगरे थप एक वर्ष कारावास बस्नुपर्ने फैसलामा उल्लेख छ।
​”अपराध गर्ने जोकोहीलाई पनि कानुनी कठघरामा उभ्याउन र प्रत्येक पीडितलाई न्याय सुनिश्चित गर्न सिलगढी पुलिस सदैव प्रतिबद्ध छ,” सिलगढी पुलिस कमिस्नरेटद्वारा जारी विज्ञप्तिमा भनिएको छ।