​राभाङ्ला: दक्षिण सिक्किममा भारतीय जनता पार्टी (भाजपा) को संगठनलाई एउटा ठूलो सफलता मिलेको छ। बरफङ र याङ्गाङ निर्वाचन क्षेत्रका १५ वटा परिवारहरूले विभिन्न दल परित्याग गरी औपचारिक रूपमा भाजपा सिक्किमको सदस्यता ग्रहण गरेका छन्। राभाङ्लास्थित पार्टी कार्यालयमा आयोजित एक विशेष कार्यक्रमका बीच उनीहरूलाई भाजपा परिवारमा भव्य स्वागत गरियो।
​उक्त पार्टी प्रवेश कार्यक्रममा भाजपा सिक्किमका प्रदेश अध्यक्ष श्री डी.आर. थापाको मुख्य उपस्थिति रहेको थियो भने नाम्ची जिल्ला प्रभारी श्रीमती अरुणा माङ्गर, प्रदेश सचिवद्वय श्री भूपेन्द्र गिरी र श्री साङ्गे पुल्गर, किसान मोर्चाका प्रदेश अध्यक्ष श्री नमो वाङ्ग्छुक, एसटी मोर्चाका अध्यक्ष श्री कर्मा सोनम भुटिया, महिला मोर्चा अध्यक्ष एवं काउन्सिलर श्रीमती सृजना क्षेत्री, प्रवक्ता श्री साङ्गे ग्यात्सो भुटिया, जिल्ला अध्यक्ष श्री ताशी दादुल भुटिया, मण्डल अध्यक्ष श्री प्रदीप गुरुङ लगायत पार्टीका वरिष्ठ पदाधिकारी तथा कार्यकर्ताहरूको बाक्लो उपस्थिति रहेको थियो।
​कार्यक्रममा नयाँ सदस्यहरूलाई खदा लगाएर स्वागत गर्दै पार्टी नेतृत्वले यी परिवारहरूको निर्णयले माननीय प्रधानमन्त्री श्री नरेन्द्र मोदीको नेतृत्व, सुशासन र जनकल्याणप्रति जनताको बढ्दो विश्वासलाई स्पष्ट पारेको बताए। नवप्रवेशी सदस्यहरूले पनि भाजपाको समावेशी विकासको दृष्टिकोणमाथि पूर्ण आस्था प्रकट गर्दै आत्मनिर्भर सिक्किम निर्माणका लागि सक्रिय भएर कार्य गर्ने प्रतिबद्धता जनाएका छन्।
​सो अवसरमा कार्यक्रमलाई सम्बोधन गर्दै प्रदेश अध्यक्ष श्री डी.आर. थापाले मोदी सरकारको १२ वर्षको ऐतिहासिक कार्यकालको चर्चा गर्नुभयो। उहाँले पारदर्शी शासनका साथै किसान, महिला, युवा र सीमान्तकृत समुदायको सशक्तीकरणका लागि भएका विभिन्न कल्याणकारी कार्यहरूका बारेमा प्रकाश पार्नुभयो। अध्यक्ष थापाले सिक्किममा भाजपा र सत्तारूढ एसकेएम गठबन्धन साझेदार रहेकाले नवप्रवेशी सदस्यहरूले कुनै पनि प्रकारको शङ्का वा त्रास नराखी स्वतन्त्र र निर्धक्क भई संगठनको विस्तार र जनताको हितका लागि काम गर्न आग्रह गर्नुभयो। उहाँले नयाँ सदस्यहरूलाई भुइँतहदेखि नै पार्टीलाई थप सुदृढ बनाउन आह्वान समेत गर्नुभयो।
​भाजपा नेतृत्वले सिक्किममा पार्टीको आधार कसिलो बनाउँदै ‘समृद्ध सिक्किम’ र ‘विकसित भारत’ को साझा लक्ष्य प्राप्तिका लागि सामूहिक रूपमा अघि बढ्ने आफ्नो सङ्कल्पलाई फेरि एकपटक दोहोर्‍याएको छ। यस सामूहिक दल-बदलले आगामी दिनमा दक्षिण सिक्किमको राजनीतिक समीकरणमा भाजपालाई अझ मजबुत बनाउने राजनीतिक विश्लेषकहरूको अनुमान छ।