सडक विभागलाई विस्तृत प्रतिवेदन बुझाउन निर्देशन

​मङ्गन: मङ्गन जिल्ला न्यायालयकी जुडिशियल मजिस्ट्रेट नैरित्य शर्माले जङ्गु क्षेत्रमा पूर्वाधार र सडक पहुँचको वास्तविक स्थितिको मूल्याङ्कन गर्न आज साङ्कलाङदेखि लाभेनसम्म एउटा महत्त्वपूर्ण स्थलगत सर्वेक्षण गरेकी छन्। यस निरीक्षण भ्रमणमा मङ्गनका एडीएम पेमा वाङछेन नामकर्पा, जङ्गुका एसडीएम गिदोन लेप्चा, सडक तथा पुल विभागका अधिकारीहरूका साथै जिल्ला र सम्बन्धित वार्डका ग्राम पञ्चायत सदस्यहरूको पनि बाक्लो उपस्थिति रहेको थियो।
​निरीक्षणको क्रममा मजिस्ट्रेट शर्मासहितको टोलीले यस मार्गको वर्तमान अवस्थाको मिहिन ढंगमा समीक्षा गर्दै क्षेत्रका बासिन्दाहरूले दैनिक रूपमा भोग्नुपरिरहेको यातायात र सम्पर्कका चुनौतीहरूबारे प्रत्यक्ष जानकारी लियो। यस अवधिमा टोलीले विशेष गरी जङ्गुको भित्री भागमा अवस्थित गाउँहरूमा ध्यान केन्द्रित गरेको थियो, जहाँ सडक पूर्वाधार अत्यन्तै सीमित छ र पहुँच मार्गको अभाव स्थानीय समुदायका लागि लामो समयदेखि चिन्ताको विषय बन्दै आएको छ।
​यस भ्रमणले जङ्गुको दुर्गम अनि पहाडी भूभागमा बसोबास गर्ने सर्वसाधारणले सामना गर्नुपर्ने सास्तीहरूलाई फेरि एकदा उजागर गरेको छ, जहाँ यातायातको असुविधाले गर्दा मानिसहरूको दैनिक जीवन नराम्ररी प्रभावित हुने गर्दछ। यहाँका बासिन्दाहरू शिक्षा, स्वास्थ्य सेवा, प्रशासनिक कामकाज र बजार-हाटसम्म पुग्नका निम्ति अझै पनि भिरपहरा र अत्यन्तै कठिन मार्गहरूमा भर पर्नुपर्ने बाध्यात्मक स्थिति रहेको छ।
​स्थलगत सर्वेक्षणकै क्रममा जुडिशियल मजिस्ट्रेट शर्माले सडक तथा पुल विभागका अधिकारीहरूसँग विभिन्न ग्राम पञ्चायत एकाइहरूका निम्ति तय गरिएका सडक परियोजनाहरू र यातायात व्यवस्था चुस्त बनाउने योजनाहरूको प्रगतिबारे विस्तृत सोधपुछ गरिन्। दुर्गम क्षेत्रका जनताको समस्यालाई गम्भीरतापूर्वक लिँदै उनले सम्बन्धित विभागलाई सडकहरूको वर्तमान अवस्था, प्रस्तावित एवं स्वीकृत भइसकेका परियोजनाहरूको पछिल्लो स्थिति र प्रभावित क्षेत्रहरूमा यातायात सुधारका निम्ति चालिएका कदमहरूको स्पष्ट रूपरेखासहितको विस्तृत प्रतिवेदन चाँडोभन्दा चाँडो अदालतसमक्ष पेश गर्ने कडा निर्देशन जारी गरेकी छन्।