काम चाँडो सक्न एनएचआईडीसीएल र बीएसएनएललाई निर्देशन
​

गेजिङ: ​राज्यपाल ओमप्रकाश माथुरले आफ्नो तीन दिवसीय औपचारिक भ्रमणको अन्तिम दिन शुक्रबार गेजिङ जिल्लामा सञ्चालित केन्द्र तथा राज्य सरकारका विभिन्न विकासात्मक योजनाहरूको प्रगतिबारे उच्चस्तरीय समीक्षा गरेका छन्। जिल्लाबाट प्रस्थान गर्नुअघि राज्यपाल माथुरको अध्यक्षतामा क्योङ्सास्थित एक स्थानीय होटलको सम्मेलन हलमा उक्त महत्त्वपूर्ण बैठक सम्पन्न भएको हो।
​बैठक मुख्य रूपमा सुशासनलाई सुदृढ पार्ने, जिल्लाको विकासात्मक प्रगतिको मूल्याङ्कन गर्ने तथा महत्त्वपूर्ण पूर्वाधार र कनेक्टिभिटी (सम्पर्क सञ्जाल) का समस्याहरूलाई सम्बोधन गर्ने विषयमा केन्द्रित थियो।
​समीक्षाका क्रममा राज्यपाल माथुरले गेजिङका जिल्लापालद्वारा उठाइएका गम्भीर चिन्ताहरूलाई सम्बोधन गर्दै राष्ट्रिय राजमार्ग तथा पूर्वाधार विकास निगम लिमिटेड (एनएचआईडीसीएल) लाई क्षेत्रमा जारी सडक तथा पूर्वाधारका कामहरू छिटोभन्दा छिटो सम्पन्न गर्न कडा निर्देशन दिएका छन्। यसैगरी, सीमा क्षेत्रमा सञ्चार सम्पर्कलाई सुदृढ बनाउने उद्देश्यले उनले भारत सञ्चार निगम लिमिटेड (बीएसएनएल) लाई सीमा आउट पोस्ट चिवाभञ्ज्याङ जाने सडक खण्डमा तत्काल १० वटा दूरसञ्चार टावर (बेस ट्रान्सीभर स्टेशन) निर्माण गर्न निर्देशित गरे। राज्यपालले यी परियोजनाहरूको प्रगति प्रतिवेदन यसै महिनाभित्र जिल्लापालमार्फत लोकसभा सांसदसमक्ष पेश गर्न सम्बन्धित विभागलाई स्पष्ट भनेका छन्।
​परियोजनाहरूलाई समयमै सम्पन्न गराउन अनुगमन प्रणालीलाई कडा बनाइने उल्लेख गर्दै राज्यपाल माथुरले अबदेखि मासिक रूपमा लोक भवनमा अनुगमन बैठक आयोजना हुने जानकारी दिए। यसका साथै एनएचआईडीसीएल र बीएसएनएल अन्तर्गत सञ्चालित आयोजनाहरूको नियमित रेखदेखका लागि जिल्ला स्तरमै मासिक बैठक सञ्चालन गर्न उनले जिल्लापाललाई निर्देश गरेका छन्।
​बैठकमा राज्यपालले जिल्लाभरि लागू भइरहेका विभिन्न जनकल्याणकारी तथा विकास निर्माणका पहलहरूको वर्तमान स्थितिको समेत विस्तृत समीक्षा गरेका थिए। उनले विभिन्न सरकारी विभागका प्रमुखहरूसँग प्रत्यक्ष अन्तरक्रिया गर्दै राज्य र केन्द्र सरकारका योजनाहरूको लाभ विनाअवरोध र तत्काल वास्तविक लक्षित वर्गसम्म पुऱ्याउनका लागि आपसी समन्वयमा जोड दिए।

उक्त उच्चस्तरीय समीक्षा बैठकमा लोकसभा सांसद इन्द्रहाङ सुब्बा, गेजिङका जिल्लापाल तेन्जिङ डी. डेन्जोङ्पा, पुलिस अधीक्षक छिरिङ शेर्पा, एडीसी (मुख्यालय) तृप्ती हाङमा सुब्बा, एसडीएम (मुख्यालय) सन्देश सुब्बा, ३६औं बटालियन एसएसबी याङ्तेका कमान्डेन्ट संजीव कुमार तथा ७२औं बटालियन एसएसबी मल्ली आचिङका कमान्डेन्ट जय प्रकाश लगायत अन्य वरिष्ठ अधिकारीहरूको उपस्थिति रहेको थियो।