गान्ताेक: भारत निर्वाचन आयोग (ईसीआई) को निर्देशनअनुसार मतदाता नामावलीमा नाम छुटेका र नयाँ (युवा) मतदाता दर्ताका लागि सञ्चालन गरिने विशेष अभियानबारे गान्तोकमा समीक्षा बैठक सम्पन्न भएको छ।
​गान्तोकस्थित जिल्ला प्रशासनिक केन्द्र (डीएसी) मा शुक्रबार जिल्लापाल एवं जिल्ला निर्वाचन अधिकारी रोहन अगवानेको अध्यक्षतामा बैठक बसेको हो।
​बैठकमा जिल्ला निर्वाचन अधिकारी अगवानेले मान्यता प्राप्त राजनीतिक दलका प्रतिनिधिहरूसँग छलफल गर्दै हालको मतदाता नामावलीमा नाम समावेश नभएका योग्य नागरिकहरूलाई दर्ता प्रक्रियामा सहभागी गराउने उपायहरूबारे जानकारी गराए।
​निर्वाचन आयोगको निर्देशानुसार, विशेष गहन पुनरीक्षण (एसआईआर) अघिको नामावलीमा नाम भएका तर हाल छुटेका र पहिलोपटक नाम दर्ता गराउन चाहने युवाहरूलाई लक्ष्य गरी यो अभियान चलाउन लागिएको हो।
​अभियानलाई प्रभावकारी बनाउन बुथ लेभल अफिसर (बीएलओ), निर्वाचन दर्ता अधिकारी (ईआरओ) र राजनीतिक दलहरूबीच समन्वय हुनुपर्नेमा जोड दिइएको छ। बीएलओहरूलाई पुराना र हालका नामावली तुलना गरी छुटेका नागरिकको पहिचान गर्न र घरदैलो कार्यक्रममार्फत फारम-६ भरौना निर्देशन दिइएको छ।
​साथै, मजदुर बस्ती, रात्रिकालीन आश्रयस्थल र घरविहीन तथा सीमान्तकृत समुदायका नागरिकलाई सहज बनाउन विशेष शिविर सञ्चालन गरिनेछ। ‘स्वीप’ कार्यक्रम तथा जनचेतनामूलक गतिविधिमार्फत मतदाता दर्ताबारे जानकारी गराइने बैठकमा जनाइएको छ।