​गान्तोक:”सिक्किम राइफल एसोसिएशनको तत्त्वावधानमा आजदेखि गान्तोकस्थित सिक्किम राइफल एन्ड पिस्तोल एकेडेमीको सुटिङ रेन्जमा दुई दिवसीय सिक्किम राज्य सुटिङ च्याम्पियनसिप २०२६ सुरु भएको छ। राष्ट्रिय राइफल एसोसिएशन अफ इन्डिया (एनआरएआई)- सँग सम्बद्ध सिक्किम राइफल एसोसिएशनद्वारा यो राज्यस्तरीय प्रतियोगिताको आयोजना गरिएको हो।
​यस उद्घाटन अनुष्ठानमा गान्तोक नगर निगमकी मेयर सुश्री छिरिङ पाल्डेन भोटिया मुख्य अतिथिका रूपमा उपस्थित हुनुहुन्थ्यो। यसै गरी, गान्तोक पुलिस रेन्ज तथा अपराध अनुसन्धान विभाग (सीआईडी) का पुलिस उप-महानिरीक्षक (डीआईजीपी) श्री तेन्जिङ लोदेन लेप्चा विशिष्ट अतिथिका रूपमा अनि १ सिक्किम बटालियन एनसीसीका कमान्डिङ अफिसर कर्नल पङ्कज कुमार विशेष अतिथिका रूपमा उपस्थित रहनुभएको थियो।
​अनुष्ठानलाई सम्बोधन गर्नुहुँदै मुख्य अतिथि मेयर सुश्री छिरिङ पाल्डेन भोटियाले राज्यस्तरीय च्याम्पियनसिपको सफल आयोजनाका निम्ति आयोजक समितिलाई बधाई ज्ञापन गर्नुभयो। उहाँले नवोदित सुटरहरूका लागि आफ्नो प्रतिभा प्रदर्शन गर्ने यो एउटा सुनौलो मञ्च भएको उल्लेख गर्नुभयो। युवाहरूको आत्मविश्वास, अनुशासन र सर्वाङ्गीण विकासमा खेलकुदको बढ्दो महत्त्वमाथि प्रकाश पार्नुहुँदै मेयरले सुटिङ जस्तो एकाग्रताको खेलमा असाधारण ध्यान, दृढता र मानसिक शक्तिको आवश्यकता पर्ने बताउनुभयो। उहाँले प्रतिभागीहरूलाई यस अवसरको भरपूर सदुपयोग गर्दै उत्कृष्ट प्रदर्शन गर्न र आगामी दिनमा उच्च स्तरका प्रतियोगिताहरूमा सिक्किमको नाम रोशन गर्ने प्रेरणा दिनुभयो। राज्यका धेरैभन्दा धेरै युवाहरूले सुटिङलाई खेलका रूपमा अपनाएर यसमा व्यावसायिक भविष्य बनाउनेछन् भन्ने आशा पनि उहाँले व्यक्त गर्नुभयो।
​यस अवसरमा डीआईजीपी श्री तेन्जिङ लोदेन लेप्चाले पनि सभालाई सम्बोधन गर्नुहुँदै सुटिङ खेलमा अन्तर्निहित अनुशासन, धैर्य, एकाग्रता र जिम्मेवारीको मूल्यमाथि जोड दिनुभयो। यस्ता प्रतियोगिताहरूले खेलाडीहरूको प्राविधिक कौशललाई निखार्ने मात्र नभई उनीहरूको चरित्र निर्माण र आत्म-विश्वास बढाउनमा पनि ठुलो योगदान पुर्‍याउने विचार उहाँले व्यक्त गर्नुभयो। सिक्किममा सुटिङ खेलको प्रवर्द्धनका लागि सिक्किम राइफल एसोसिएशनले गरिरहेको प्रयासको सराहना गर्नुहुँदै उहाँले भन्नुभयो कि उचित प्रशिक्षण सुविधाको स्थापना र नियमित प्रतियोगिताहरूको आयोजनाले स्थानीय प्रतिभाहरूलाई पहिचान गर्न र उनीहरूलाई तिखार्न ठुलो मद्दत पुग्नेछ। उहाँले खेलाडीहरूलाई आफ्नो लक्ष्यप्रति प्रतिबद्ध रहन र राष्ट्रिय तथा अन्तर्राष्ट्रिय स्तरमा सफलता हासिल गर्न निरन्तर कडा परिश्रम गरिरहने आह्वान गर्नुभयो।
​उल्लेखनीय छ, सन् २०२४ मा स्थापना भएको सिक्किम राइफल एसोसिएशन राज्यमा एयर राइफल, एयर पिस्तोल र स्मल-बोर सुटिङ जस्ता ओलम्पिक सुटिङ विधाहरूको प्रवर्द्धनका निम्ति जिम्मेवार राज्यस्तरीय संस्था हो। यस एसोसिएशनको अध्यक्षता श्री सञ्जय बुढाथोकीले गरिरहनुभएको छ।
​च्याम्पियनसिपको पहिलो दिन आज १० मिटर एयर पिस्तोल र १० मिटर पिप साइट एयर राइफल विधामा २२ जना सुटरहरूले प्रतिस्पर्धा गरेका थिए। प्रतिभागीहरूलाई सब-युथ पुरुष (एयर पिस्तोल), युथ महिला (एयर पिस्तोल), सिनियर पुरुष (एयर पिस्तोल), सिनियर महिला (एयर पिस्तोल), सिनियर पुरुष (एयर राइफल) र सिनियर महिला (एयर राइफल) गरी विभिन्न वर्गमा वर्गीकरण गरिएको थियो।
​प्रतियोगितामा प्रत्येक टार्गेट कार्डको अधिकतम अङ्क १० तोकिएको छ, जसमा निशाना ‘बुल्स-आई’ (केन्द्र) भन्दा जति टाढा जान्छ, अङ्क त्यति नै घट्दै जानेछ। प्रत्येक प्रतिभागीले ४० वटा सट प्रहार गरेका थिए, जसअनुसार कुल पूर्णाङ्क ४०० रहेको थियो।
​उद्घाटन दिनको खेलहरूको निर्णायकका रूपमा राष्ट्रिय राइफल एसोसिएशन अफ इन्डियाका प्राविधिक अधिकारीहरू सुश्री अञ्जली सिंह र श्री जोन थौनाओजम रहनुभएको थियो भने मेघालय सुटिङ एसोसिएशनकी सुश्री बालारी शिशा रानीले परिणाम, समय र स्कोरिङको जिम्मेवारी सम्हाल्नुभएको थियो।
​यस उद्घाटन समारोहमा अवकाशप्राप्त एसपी सुश्री ओङ्मु, सिक्किमे क्रिकेटर श्री आशिष थापा, मेघालय सुटिङ एसोसिएशनका महासचिव एवं एनआरएआई कार्यकारी समितिका सदस्य श्री नील सुटिङ्क, सिक्किम राइफल एसोसिएशन तथा मेघालय सुटिङ एसोसिएशनका सदस्यहरू लगायत अन्य सरोकारवालाहरूको पनि उपस्थिति रहेको थियो।