​गान्तोक: भारत सरकारको कोइला, खान एवं इस्पातसम्बन्धी संसदीय स्थायी समितिको उच्चस्तरीय टोलीले सिक्किमको भ्रमण गर्दै राज्यको विकास र वातावरणीय सन्तुलनबारे गम्भीर छलफल अघि बढाएको छ। समितिका अध्यक्ष एवं प्रभावशाली नेता अनुराग सिंह ठाकुरको नेतृत्वमा आएको टोलीले आज लोकभवनमा सिक्किमका राज्यपाल ओमप्रकाश माथुरसँग शिष्टाचार भेट गर्दै राज्यको वस्तुस्थितिबारे जानकारी लिएको हो। लोकभवनमा आयोजित विशेष संवाद सत्रका क्रममा सांसद ठाकुरले सिक्किमको अनुपम स्वच्छता, सडकमा देखिने यातायात अनुशासन र यहाँको लोभलाग्दो आतिथ्य सत्कारको मुक्तकण्ठले प्रशंसा गर्दै सिक्किमलाई अन्य राज्यका लागि प्रेरणाको स्रोत बताएका छन्।
​भेटघाटका क्रममा राज्यपाल ओमप्रकाश माथुरले समितिका सदस्यहरूलाई सिक्किमले पर्यावरण संरक्षणको क्षेत्रमा हासिल गरेका ऐतिहासिक उपलब्धिहरू र राज्य सरकारले सञ्चालन गरिरहेका नवीन योजनाहरूबारे विस्तृत जानकारी गराएका थिए। उनले नथुला नाकाको सामरिक तथा ऐतिहासिक महत्त्वमाथि प्रकाश पार्दै सिक्किमको समग्र विकास र सामाजिक संरचनामा यहाँका महिलाहरूको सक्रिय एवं नेतृत्वदायी भूमिकाबारे आफ्ना गहन विचारहरू साझा गरे। राज्यपालले विकासको दौडमा प्रकृतिलाई नबिर्सिने सिक्किमको ‘सतत विकास’ को मोडल नै राज्यको वास्तविक पहिचान भएको र यसलाई केन्द्र सरकारले थप प्रवद्र्धन गर्नुपर्नेमा जोड दिएका छन्।

​राजनीतिक र प्रशासनिक रूपमा महत्त्वका साथ हेरिएको यस भ्रमणका क्रममा समितिले गान्तोकमा कोइला मन्त्रालय, बीसीसीएल, एनईसी र सीसीएलका उच्च प्रतिनिधिहरूसँग पनि घनिभूत छलफल गरेको छ। विशेषगरी कोइला खानहरूको वैज्ञानिक संरक्षण, सुरक्षा मापदण्ड र पूर्वाधार विकासका चुनौतीहरूमाथि विस्तृत समीक्षा गरिएको थियो। राज्यपालका आयुक्त एवं सचिव जितेन्द्रसिंह राजेको समेत उपस्थिति रहेको उक्त कार्यक्रमले केन्द्र र राज्यबीचको समन्वयलाई थप मजबुत बनाउने अपेक्षा गरिएको छ। यो भ्रमणले हिमाली राज्य सिक्किमको विकासका मुद्दालाई राष्ट्रियस्तरको नीति निर्माणमा थप प्राथमिकता दिलाउने संकेत गरेको छ।