पलजोर स्टेडियममा भयो ‘फूल ड्रेस रिहर्सल’

​गान्ताेक: भारतको ८०औँ स्वतन्त्रता दिवसको राज्यस्तरीय समारोहको पूर्वसन्ध्यामा आज गान्ताेकस्थित पलजोर स्टेडियममा भव्य ‘फूल ड्रेस रिहर्सल’ (अन्तिम अभ्यास) सम्पन्न भएको छ। मुख्य कार्यक्रमअघि सम्पूर्ण व्यवस्थापन तथा समन्वयको समीक्षा गर्न यो अभ्यास आयोजना गरिएको हो।
​उक्त रिहर्सलको मुख्य सचिव आर टेलङ र प्रहरी महानिरीक्षक (डीजीपी) अक्षय सचदेवाले संयुक्त रूपमा अनुगमन गर्नुभएको थियो। उहाँहरूले कार्यक्रमस्थलको समग्र प्रबन्ध र मिनेट-टू-मिनेट तालिका अनुसारका कार्यक्रमहरूको कार्यान्वयनको वस्तुस्थितिबारे जानकारी लिनुभयो।
​अन्तिम अभ्यासका क्रममा स्वतन्त्रता दिवसको दिन तय गरिएका विभिन्न औपचारिक तथा सांस्कृतिक कार्यक्रमहरूको परीक्षण गरिएको थियो। जसमा अतिथिहरूको आगमन तथा स्वागत, औपचारिक प्रक्रिया, परेड तथा मार्चपास्ट, र सांस्कृतिक प्रस्तुतिहरू समावेश थिए। यस अभ्यासले कार्यक्रमको समय व्यवस्थापन, क्रमबद्धता र विभिन्न निकायहरूबीचको समन्वयको मूल्याङ्कन गर्नका साथै थप सुधार गर्नुपर्ने पक्षहरूको पहिचान गर्न सहयोग पुर्‍याएको छ।
​उक्त रिहर्सल कार्यक्रममा विभिन्न विभागका प्रमुखहरू, गृह (प्रोटोकल) विभाग, प्रहरी विभाग, सम्बन्धित अन्य सरकारी निकायका वरिष्ठ अधिकारीहरूको उपस्थिति रहेको थियो।