लखनऊ: प्रधानमन्त्री नरेन्द्र मोदीले बुधबार उत्तर प्रदेशको हरदोई जिल्लामा राज्यको सबैभन्दा लामो गंगा एक्सप्रेसवे उद्घाटन गरेका छन्। उनले भने, जसरी माँ गंगा हजारौँ वर्षदेखि उत्तर प्रदेश र देशको जीवनरेखा रहँदै आएकी छन्, त्यसरी नै आधुनिक विकासको यस युगमा यो गंगा एक्सप्रेसवे राज्यको विकासको नयाँ जीवनरेखा बन्नेछ।
उद्घाटन समारोहमा उपस्थित जनसमूहलाई सम्बोधन गर्दै प्रधानमन्त्री नरेन्द्र मोदीले भने, “यो संयोग हो कि म पछिल्ला चार–पाँच दिनदेखि माँ गंगाको सान्निध्यमा छु। आज बिहान म काशीको दर्शन गरेर आएको हुँ र अब मलाई माँ गंगाको नाममा राखिएको यस एक्सप्रेसवेको उद्घाटन गर्ने अवसर प्राप्त भएको छ।” उनले उत्तर प्रदेश सरकारले यसलाई गंगाको नाम दिनु विकास र सम्पदाको संगम भएको बताए।
प्रधानमन्त्रीले भने, आज लोकतन्त्रको उत्सवको महत्वपूर्ण दिन हो र पश्चिम बंगालमा दोस्रो चरणको मतदान भइरहेको छ। उनले मतदाताको उच्च सहभागिताप्रति खुशी व्यक्त गर्दै मानिसहरू बिना डर मतदान गरिरहेको बताए।
उनले हालका चुनावी परिणामहरूको उल्लेख गर्दै बिहार र गुजरातमा भाजपा-एनडीएले उल्लेखनीय सफलता हासिल गरेको बताए। साथै उनले पाँच राज्यका आगामी विधानसभा चुनावमा पनि भाजपाले ह्याट्रिक गर्ने विश्वास व्यक्त गरे।
प्रधानमन्त्रीले भने, देशको विकासका लागि द्रुत गतिमा पूर्वाधार निर्माण आवश्यक छ। उनले सन् २०२१ डिसेम्बरमा शाहजहाँपुरमा गंगा एक्सप्रेसवेको शिलान्यास गरेको स्मरण गराउँदै छोटो समयमा नै परियोजना सम्पन्न भएको बताए। उनले यसको विस्तार मेरठदेखि हरिद्वारसम्म हुने जानकारी दिए।
उनले “डबल इन्जिन सरकार” को काम गर्ने शैलीको चर्चा गर्दै अब शिलान्याससँगै परियोजनाको उद्घाटन पनि छिट्टै हुने बताए।

प्रधानमन्त्रीले किसानहरूलाई अब आफ्नो उत्पादन ठूला बजारसम्म पुर्‍याउन सहज हुने र औद्योगिक कोरिडोरबाट लाखौँ रोजगारी सिर्जना हुने बताए। उनले उत्तर प्रदेश ट्रिलियन डलर अर्थतन्त्रतर्फ तीव्र गतिमा अघि बढिरहेको पनि उल्लेख गरे।
कार्यक्रममा उत्तर प्रदेशकी राज्यपाल आनन्दीबेन पटेल, मुख्यमन्त्री योगी आदित्यनाथ, केन्द्रीय मन्त्री पंकज चौधरी, जितिन प्रसाद, उपमुख्यमन्त्री केशव प्रसाद मौर्य, ब्रजेश पाठक लगायत अन्य विशिष्ट व्यक्तिहरू उपस्थित थिए।