गान्तोक :भारत सरकारकी सूक्ष्म, साना तथा मझौला उद्यम (एमएसएमई) र श्रम एवं रोजगार केन्द्रीय राज्यमन्त्री सुश्री शोभा करन्दलाजे सिक्किमको दुई दिने आधिकारिक भ्रमणको सिलसिलामा गान्तोक आइपुग्नुभएको छ। भ्रमणको पहिलो दिन आज उहाँले राजधानीको मनन केन्द्रमाथि निर्माण भइरहेको महत्त्वाकांक्षी परियोजना ‘पीएम एकता मल’ (युनिटी मल) को स्थलगत निरीक्षण गरी प्रगतिको उच्चस्तरीय समीक्षा गर्नुभयो। गान्तोक आगमनमा केन्द्रीय राज्यमन्त्री करन्दलाजेलाई भवन तथा आवास विभागका पीसीई-सह-सचिव श्री चन्द्र विजय बस्नेत, भवन तथा आवास विभागका पीसीई श्री वाई.एन. गौतम र विभागका अन्य वरिष्ठ अधिकारीहरूले भव्य स्वागत गर्नुभएको थियो। स्वागत पश्चात् मन्त्रीले निर्माण कार्यको स्थलगत अवलोकन गर्दै निर्धारित समयभित्रै काम सम्पन्न गर्न निर्देशन दिनुभयो।
केन्द्रीय बजेट २०२३–२४ मा घोषणा गरिएको ‘पीएम एकता मल’ परियोजनालाई देशकै प्रतिष्ठित व्यापारिक तथा सांस्कृतिक केन्द्रको रूपमा विकसित गरिँदैछ। यस मलको अनुमानित निर्माण लागत १०६ करोड रुपियाँ रहेको छ भने यो शतप्रतिशत केन्द्र सरकारको वित्तीय सहयोगमा निर्माण भइरहेको छ। यसका लागि केन्द्रले राज्य सरकारलाई ५० वर्षको अवधिसम्मका लागि ब्याजमुक्त ऋण उपलब्ध गराएको छ र परियोजनाका लागि आवश्यक जग्गा व्यवस्थापनको जिम्मेवारी भने सिक्किम राज्य सरकारले पूरा गरेको छ। यो मल ‘एक जिल्ला एक उत्पादन’, भौगोलिक सङ्केत (जीआई) प्राप्त रैथाने उत्पादनहरू, परम्परागत ह्यान्डलूम र हस्तशिल्पका वस्तुहरूलाई प्रवर्द्धन गर्ने एउटा साझा र अद्वितीय राष्ट्रिय प्लेटफर्म बन्नेछ, जहाँ भारतका विभिन्न राज्यका परम्परागत उत्पादनहरू एकै छानामुनि उपलब्ध हुनेछन्। निर्माण कार्य द्रुत गतिमा अघि बढिरहेको यो परियोजना सन् २०२७ भित्रमा पूर्ण रूपमा सम्पन्न भई सञ्चालनमा आउने तालिका रहेको छ।
’पीएम एकता मल’ को निरीक्षण पश्चात् केन्द्रीय राज्यमन्त्री करन्दलाजेले सिचेस्थित सिक्किमको पहिलो सरकारी मेडिकल कलेज ‘हेलेन लेप्चा सरकारी मेडिकल कलेज’ (HLGMC) को पनि विस्तृत भ्रमण गर्नुभयो। मेडिकल कलेज परिसरमा उहाँलाई एसटीएनएम अस्पतालकी मेडिकल सुपरिटेन्डेन्ट डा. रुथ योन्जोन, एचएलजीएमसीका प्रोफेसर-सह-डीन डा. विक्रम खड्का, प्रोफेसर-सह-सहयोगी डीन डा. कर्मा लोडे भोटिया, एसटीएनएम अस्पतालका निर्देशक डा. डी.बी. बिष्ट र सहायक मेडिकल सुपरिटेन्डेन्ट डा. चिन्तामणि शर्मा लगायतका वरिष्ठ चिकित्सक तथा अधिकारीहरूले स्वागत गर्नुभएको थियो।
शैक्षिक सत्र र प्राज्ञिक कार्य सञ्चालन भएपछि यस कलेजमा वार्षिक १०० जना एमबीबीएस विद्यार्थीहरूले भर्ना पाउनेछन्, जसले सिक्किमका साथै सम्पूर्ण उत्तर-पूर्वी क्षेत्रका चिकित्साशास्त्र पढ्न चाहने विद्यार्थीहरूका लागि नयाँ अवसर सिर्जना गर्नेछ। भ्रमणका क्रममा मन्त्रीले कलेजको अत्याधुनिक लेक्चर थियेटर, प्रशासनिक भवन र काउन्सिल रूमको निरीक्षण गर्दै फ्याकल्टी र अधिकारीहरूसँग अन्तरक्रिया गर्नुभयो र निर्माणको भौतिक तथा प्राविधिक प्रगतिको जानकारी लिनुभयो। यस कलेजको स्थापनाले सिक्किममा स्वास्थ्य सेवाको गुणस्तरलाई अन्तर्राष्ट्रिय स्तरको बनाउन र चिकित्सा सेवाको पहुँचलाई थप सुदृढ पार्न ठूलो सहयोग पुग्ने विश्वास लिइएको छ।
About Author
