​नाम्ची: भारत सरकारका उत्तरपूर्वी क्षेत्र विकास (डोनर) तथा सञ्चार मन्त्री ज्योतिरादित्य एम. सिन्धियाको तीन दिवसीय औपचारिक सिक्किम भ्रमणलाई लिएर नाम्चीमा प्रशासनिक तयारी तीव्र पारिएको छ। मन्त्री सिन्धियाको १४ देखि १६ मईसम्म हुने भ्रमणको पूर्वसन्ध्यामा आज जिल्ला प्रशासनिक केन्द्र नाम्चीमा एक विशेष समन्वय बैठक आयोजना गरियो। जिल्लापाल अनुपा तामलिङको अध्यक्षतामा बसेको उक्त बैठकमा मन्त्रीको स्वागत, सुरक्षा व्यवस्था र भ्रमण गरिने स्थलहरूको तयारीका विषयमा विस्तृत छलफल भएको छ। जिल्लापाल तामलिङले केन्द्रीय मन्त्री आजै नाम्ची आइपुग्ने कार्यक्रम रहेको जानकारी दिँदै भ्रमणलाई व्यवस्थित बनाउन सबै विभागलाई उच्च सतर्क रहन निर्देशन दिनुभएको छ।
​प्रस्तावित भ्रमण तालिका अनुसार केन्द्रीय मन्त्री सिन्धियाले भोलि नाम्ची जिल्लाका विभिन्न महत्वपूर्ण परियोजना र पर्यटकीय स्थलहरूको निरीक्षण गर्नुहुनेछ। उहाँले तिमी चिया बगान, सिक्किम राज्य विश्वविद्यालय, आईएचसीएई चेम्चे, भाइचुङ स्टेडियम र प्रसिद्ध भालेढुङ्गा स्काईवाक परियोजना स्थलको भ्रमण गर्ने कार्यक्रम तय भएको छ। भ्रमणका क्रममा उहाँले जिल्लाका उच्च अधिकारीहरू र सरोकारवालाहरूसँग विकास निर्माणका पहलहरूबारे अन्तरक्रिया समेत गर्नुहुनेछ। नाम्चीको कार्यक्रम सकेर मन्त्री सिन्धिया थप आधिकारिक बैठक र कार्यक्रमहरूका लागि गान्तोक जिल्लातर्फ प्रस्थान गर्नुहुनेछ।

जिल्लापालले बैठकमा प्रशासनिक समन्वय, सडकको अवस्था, ट्राफिक व्यवस्थापन र प्रोटोकल पालनाका विषयमा सम्बन्धित विभागका प्रमुखहरूलाई स्पष्ट निर्देशन दिनुभएको छ। मन्त्रीको भ्रमणका क्रममा कुनै पनि प्राविधिक वा व्यवस्थापकीय कमजोरी हुन नदिन र तोकिएका जिम्मेवारीहरू समयमै पूरा गर्न उहाँले आग्रह गर्नुभयो। केन्द्र सरकारका प्रभावशाली मन्त्रीको यस भ्रमणले सिक्किमको पूर्वाधार विकास र सञ्चार क्षेत्रका आयोजनाहरूलाई थप गति दिने अपेक्षा गरिएको छ। बैठकमा जिल्लाका विभिन्न सरकारी निकायका प्रतिनिधिहरूको उपस्थिति रहेको थियो।