‎गान्तोक: डिस्कभर टेमीका अध्यक्ष अमृत शर्माको नेतृत्वमा रहेको एक टोलीले आज सिक्किमका राज्यपाल ओमप्रकाश माथुरसँग लोक भवनमा भेटवार्ता गरेको छ।
दक्षिण सिक्किमबाट सञ्चालन भइरहेको डिस्कभर टेमी एक सामुदायिक पहल हो, जसले पर्यावरणमैत्री पर्यटन, स्थानीय गृह आवास तथा पर्यटनसम्बन्धी गतिविधिमार्फत स्थानीय समुदायका लागि अवसर सिर्जना गर्ने दिशामा कार्य गर्दै आएको छ।
भेटवार्ताका क्रममा अमृत शर्माले राज्यपाललाई पर्यटन प्रवर्द्धन तथा स्थानीय युवाहरूका लागि रोजगारीका अवसर सिर्जना गर्न डिस्कभर टेमीद्वारा सञ्चालन गरिएका विभिन्न पहल र गतिविधिबारे जानकारी गराएका थिए।
छलफलका क्रममा स्थानीय स्रोतसाधन तथा विद्यमान पूर्वाधारको उपयोग गर्दै क्षेत्रका बन्द तथा निष्क्रिय गृह आवासहरूलाई पुनः सञ्चालनमा ल्याई अनुभवमूलक पर्यटनलाई प्रोत्साहन गर्ने विषयमा पनि विशेष जोड दिइएको थियो। यस पहलले राज्यमा दिगो पर्यटन विकासलाई टेवा पुग्ने अपेक्षा गरिएको छ।
टोलीले आगामी १३ देखि १५ जुनसम्म राज्यका तीनवटा निर्वाचन क्षेत्रमा आयोजना गरिने अन्तर्राष्ट्रिय “कृषि पर्यटन उत्सव” सम्बन्धी जानकारी पनि राज्यपाललाई गराएको थियो।
उक्त कार्यक्रममा छिमेकी राष्ट्र नेपाल र भूटानको सहभागितासहित कृषि तथा सांस्कृतिक आदानप्रदान कार्यक्रम सञ्चालन गरिनेछ। यसमार्फत सिक्किमको कृषि पर्यटन क्षेत्रलाई फराकिलो मञ्च प्रदान गर्ने उद्देश्य राखिएको बताइएको छ।
राज्यपाल ओमप्रकाश माथुरले राज्यमा कृषि पर्यटन तथा दिगो पर्यटन प्रवर्द्धनका लागि डिस्कभर टेमीले गरिरहेको प्रयासको प्रशंसा गरेका थिए।