​कोलकाता: पूर्वी भारतको प्रमुख भ्यालु फेसन रिटेलर ‘स्टाइल बजार’ एसियाकै प्रतिष्ठित र ऐतिहासिक फुटबल प्रतियोगिता ‘कलकत्ता फुटबल लिग (सीएफएल) २०२६’ को मुख्य प्रायोजक (टाइटल स्पन्सर) घोषित भएको छ।
​इन्डियन फुटबल एसोसिएसन (आईएफए) द्वारा आयोजित यो लिग एक शताब्दीभन्दा बढी समयदेखि बङ्गालको खेलकुद पहिचानको अभिन्न अङ्ग रहँदै आएको छ। स्थानीय खेल प्रतिभालाई प्रवर्द्धन गर्ने र तल्लो तह (ग्रासरुट) देखि नै फुटबलको विकास गर्ने साझा उद्देश्यका साथ यो साझेदारी गरिएको जनाइएको छ।
​साझेदारीबारे बोल्दै आईएफएका सचिव अनिरबन दत्तले बङ्गालको माटोसँग जोडिएको ब्रान्ड स्टाइल बजारलाई मुख्य प्रायोजकका रूपमा स्वागत गर्न पाउँदा खुसी लागेको बताए। उनले यस सहकार्यले खेल विरासतको सम्मान गर्दै नयाँ पुस्ताका फुटबलरहरूलाई प्रेरित गर्ने विश्वास व्यक्त गरे।
​त्यस्तै, स्टाइल बजारका प्रबन्ध निर्देशक (एमडी) श्रेयान्स सुराणाले बङ्गालबाटै सुरु भएको आफ्नो ब्रान्ड यस ऐतिहासिक लिगसँग जोडिन पाउनु समुदायप्रतिको आभार प्रकट गर्ने माध्यम भएको बताए।
‘कलकत्ता फुटबल लिग २०२६’ को कमर्सियल र ब्रोडकास्ट अधिकार प्राप्त गरेको कम्पनी ‘नम्बर १० स्पोर्ट्स’ का प्रबन्ध निर्देशक भावेन कामदारले यस साझेदारीले लिगको व्यावसायिक विकास र फ्यानहरूको सहभागितालाई थप मजबुत बनाउने उल्लेख गरे।
​यस साझेदारीसँगै डिजिटल तथा ब्रोडकास्ट प्लेटफर्ममा लिगको पहुँच अझ व्यापक हुने र भारतीय फुटबलको पारिस्थितिक प्रणाली (इकोसिस्टम) लाई बलियो बनाउन मद्दत पुग्ने अपेक्षा गरिएको छ।