​सिलगढी: भारतीय जनता पार्टी (भाजपा) का वरिष्ठ नेता एवं दार्जिलिङका सांसद राजु बिष्टले पश्चिम बङ्गालका नवनियुक्त अर्थमन्त्री डा. स्वपन दासगुप्तालाई उत्तर बङ्गाल क्षेत्रमा भव्य स्वागत गरेका छन्। आगामी राज्यको बजेटका लागि आयोजना गरिएको पूर्व-बजेट परामर्श बैठकको सिलसिलामा प्रशासनिक मुख्यालय उत्तर कन्या आइपुगेका अर्थमन्त्री डा. दासगुप्तासँगको भेटघाटको तस्बिर सामाजिक सञ्जालमा सेयर गर्दै सांसद बिष्टले खुसी व्यक्त गरेका हुन्।
​सांसद बिष्टले आफ्नो आधिकारिक सामाजिक सञ्जाल पेजमा लेख्दै दार्जिलिङ पहाड, तराई, डुअर्स र समग्र उत्तर बङ्गाल क्षेत्रको आर्थिक विकास र जनअपेक्षालाई बजेटमा समेट्नका लागि अर्थमन्त्री आफैँ क्षेत्र भ्रमणमा आउनु सकारात्मक कदम भएको उल्लेख गरेका छन्। डा. दासगुप्ताको राजनीतिक र बौद्धिक उचाइको प्रशंसा गर्दै सांसद बिष्टले उनी पूर्व राज्य सभा सांसद तथा पश्चिम बङ्गालकै इतिहासमा पहिलो वैचारिक दक्षिणपन्थी अर्थमन्त्री भएको समेत प्रष्ट पारेका छन्।
​सन् २०१५ मा भारत सरकारको प्रतिष्ठित ‘पद्मभूषण’ उपाधिबाट सम्मानित डा. दासगुप्ताको विद्वता, अनुभव र सिद्धान्तनिष्ठ राजनीतिको चर्चा गर्दै सांसद बिष्टले क्षेत्रको रूपान्तरणका लागि उनीसँग सहकार्य गर्न आफूहरू उत्सुक रहेको बताएका छन्। प्रधानमन्त्री नरेन्द्र मोदीको ‘विकसित भारत’ को संकल्पलाई साकार पार्न र मुख्यमन्त्री सुवेन्दु अधिकारीले परिकल्पना गरेको नयाँ पश्चिम बङ्गालको निर्माणका लागि डा. दासगुप्ताको भूमिका महत्त्वपूर्ण रहने विश्वास सांसद बिष्टले व्यक्त गरेका छन्। पश्चिम बङ्गालको पछिल्लो राजनीतिक समीकरण र नयाँ प्रशासनिक नेतृत्वको पृष्ठभूमिमा उत्तर बङ्गालको आर्थिक विकासका लागि केन्द्र र राज्य सरकारका प्रतिनिधिहरूबीचको यो भेटघाटलाई राजनीतिक वृत्तमा निकै अर्थपूर्ण रूपमा हेरिएको छ।