​​नयाँ दिल्ली: पाकिस्तानको इस्लामावादमा शान्ति वार्ताको तयारी भइरहेका बेला ओमानको खाडीमा ईरान र अमेरिकाबीच पुनः सैन्य मुठभेड सुरु भएको छ। ईरानको अर्ध–सरकारी समाचार एजेन्सी तसनीमका अनुसार ईरानले ओमानको खाडीमा तैनाथ अमेरिकी सैन्य पोतहरूमा ड्रोनमार्फत जवाफी हमला गरेको छ। अमेरिकाले ईरानी झण्डा लागेको एक मालवाहक जहाजलाई आफ्नो नियन्त्रणमा लिएपछि उत्पन्न तनावका बीच यो सैन्य कारबाही भएको हो। यद्यपि ईरानले गरेको यो ड्रोन आक्रमणबाट अहिलेसम्म कुनै ठूलो भौतिक वा मानवीय क्षतिको विवरण भने सार्वजनिक भएको छैन।​यो तनावको सुरुवात अमेरिकी राष्ट्रपति डोनाल्ड ट्रम्पको एक घोषणापछि भएको हो, जसमा उनले नौसैनिक नाकाबन्दी अन्तर्गत खाडीमा ईरानी कार्गो जहाजलाई रोकेको बताएका थिए। अमेरिकी नौसेनाको यस कदमलाई ईरानको सबैभन्दा ठूलो सैन्य कमान्ड इकाइ ‘खातम अल–अन्बिया सेन्ट्रल हेडक्वार्टर्स’ले युद्धविरामको सीधा उल्लंघन र ‘हतियारबन्द लुट’को संज्ञा दिएको छ। ईरानी सैन्य कमान्डले यसअघि नै अमेरिकी नौसेनाको यस किसिमको उक्साहटपूर्ण कार्यको कडा जवाफ दिने चेतावनी दिएको थियो।​यस सैन्य टकरावले दुई देशबीच हुन लागेको कूटनीतिक प्रयासमा समेत धक्का पुर्‍याएको छ। अमेरिकी राष्ट्रपति ट्रम्पले आफ्ना प्रतिनिधिहरू वार्ताका लागि पाकिस्तान जान लागेको र ईरानसँग पुनः संवादका लागि आफू सकारात्मक रहेको संकेत दिएका थिए। तर, ओमानको खाडीमा भएको पछिल्लो घटना र होर्मुज स्ट्रेटमा भारतीय झण्डा भएका जहाजहरूमाथि समेत गोलीबारी भएपछि वार्ताको वातावरण धुमिल बनेको छ। एकातिर वार्ताको कुरा चल्नु र अर्कोतिर समुद्री मार्गमा सैन्य नाकाबन्दी र ड्रोन हमला हुनुले पश्चिम एसियाको संकट झन् गहिरिँदै गएको विज्ञहरूले बताएका छन्।