लण्डन: ईंग्लिश क्रिकेटमा बेजबल युगको समापन भइसकेको छ। ईंग्ल्याण्ड एण्ड वेल्स क्रिकेट बोर्ड (ईसीबी)-ले पुरुष टेस्ट टोलीको निम्ति स्टीफन फ्लेमिंगलाई नयाँ मुख्य प्रशिक्षक नियुक्त गरेको छ। यसरी अनुभवी ब्याटर जो रुटलाई दोस्रोपल्ट पूर्णकालिक टेस्ट कप्तान बनाइएको छ। बेन स्टोक्सले अन्तर्राष्ट्रिय क्रिकेटबाट सन्न्यास लिएपछि अनि त्यसको २ हप्तापछि ब्रेण्डन म्याककुलमले टेस्ट टोलीको प्रशिक्षक पद छोड़ेपछि यी दुईवटा पद रिक्त रहेको थियो। म्याककुलमले अब ईंग्ल्याण्डको वनडे र टी२० टोलीको प्रशिक्षकको रूपमा मात्र काम गर्नेछन् जबकि टेस्ट टोलीको जिम्मेवारी फ्लेमिंगले सम्हाल्नेछन्। चाखलाग्दो कुरा के छ भने यी दुवै न्यूजील्याण्डका पूर्व कप्तान हुन्। प्रशिक्षकको रूपमा फ्लेमिंगको करियर निक्कै सफल रहेको छ। उनले हालै चेन्नई सुपर किंग्स (सीएसके)-सँग आफ्नो १८ साल पुरानो यात्रा समाप्त गरेका थिए। उनकै मार्गदर्शनमा सीएसके-ले ५ पल्ट आईपीएल खिताब जितेको थियो। यसबाहेक उनले २०२३-मा द हण्ड्रेड टुर्नामेण्टमा सदर्न ब्रेवलाई पनि फाइनलसम्म पुऱ्याएका थिए। फ्लेमिंगको नियुक्ति भए पनि पाकिस्तानविरुद्ध १९ अगस्तदेखि शुरु हुने टेस्ट सीरीजमा चाहिँ मार्कस ट्रेस्कोथिकले अन्तरिम मुख्य प्रशिक्षकको जिम्मेवारी निर्वाह गर्नेछन्। फ्लेमिंग ग्रीष्मकालको अन्तमा ईंग्ल्याण्ड पुग्नेछन् अनि दिसम्बरमा दक्षिण अफ्रिका यात्रा अघि टोलीको जिम्मेवारी लिनेछन्। यसरी जो रुट पनि कप्तानको रूपमा आफ्नो दोस्रो ईनिंग्स शुरु गर्न तयार छन्। एलिस्टर कुकले कप्तानी छोड़ेपछि २०१७-मा रुटलाई ईंग्ल्याण्डको पूर्णकालिक टेस्ट कप्तान बनाइएको थियो। उनको कप्तानीमा ईंग्ल्याण्डले ६५ वटा टेस्ट म्याच खेलेर २७ वटा जित्नको साथै २७ वटा हारेको थियो। यसरी ११ वटा म्याच ड्र रहेको थियो। स्टोक्सले २०२२-मा रुटको स्थानमा कप्तानी सम्हालेका थिए। त्यहीँबाट ईंग्ल्याण्ड क्रिकेटमा स्टोक्सको कप्तानी र म्याककुलमको प्रशिक्षणमा बेजबल युग (आक्रामक ब्याटिंग गर्ने शैली)-को शुरुवात भएको थियो। बेजबल-ले शुरुवातमा सफलता हासिल गरे पनि समयको साथ यस शैलीले ईंग्ल्याण्डलाई नै नोक्सान हुन थाल्यो। यसबाहेक हालै न्यूजील्याण्डविरुद्ध ओवल टेस्ट म्याचपछि टोलीको अनुशासन भंग गर्दा स्टोक्सको साथमा गस एटकिन्सनलाई एउटा म्याचको निम्ति टोलीबाट बाहिर गरिएको थियो। त्यसपछि स्टोक्सले अन्तर्राष्ट्रिय क्रिकेटबाट नै सन्न्यासको घोषणा गर्दा कप्तानको पद खाली भएको थियो। यसैकारण ईसीबी-ले टेस्ट टोलीका सबैभन्दा अनुभवी खेलाड़ी रुटलाई कप्तान नियुक्त गर्ने फसेला गऱ्यो।