​नयाँ दिल्ली: गजाका लागि मानवीय सहायता सामग्री लिएर गइरहेको डुङ्गाको समूह (फ्लोटिला) मा सवार प्यालेस्टाइन समर्थक कार्यकर्ताहरूमाथि इजरायली नौसेना र दक्षिणपन्थी मन्त्रीले गरेको व्यवहारलाई लिएर अन्तर्राष्ट्रिय स्तरमा तीव्र आलोचना सुरु भएको छ।
​इजरायलका कट्टर दक्षिणपन्थी राष्ट्रिय सुरक्षा मन्त्री इतामार बेन-जभिरले सामाजिक सञ्जालमा एउटा भिडियो पोस्ट गरेपछि विश्वका प्रमुख देशहरूले आपत्ति जनाएका हुन्। उक्त भिडियोमा हिरासतमा लिइएका विदेशी तथा स्थानीय कार्यकर्ताहरूलाई हतकडी लगाएर घुँडा टेक्न लगाइएको छ भने मन्त्री बेन-जभिर उनीहरूको उपहास गरिरहेका देखिन्छन्।
​विश्वभरबाट विरोध
अमेरिकी राजदूत माइक हकाबीले इजरायली मन्त्रीको उक्त कदमलाई ‘घृणास्पद’ भनेका छन्। बेलायती विदेशमन्त्री यभेट कुपरले भिडियोका दृश्यहरूलाई ‘पूर्ण रूपमा शर्मनाक’ भन्दै तत्काल स्पष्टीकरणका लागि लन्डनस्थित इजरायली दूतावासलाई तलब गरेकी छन्।
​त्यसैगरी, इटालीकी प्रधानमन्त्री जोर्जिया मेलोनी, क्यानडाका प्रधानमन्त्री मार्क कार्नी र अस्ट्रेलियाकी विदेशमन्त्री पेनी वोङले पनि उक्त घटनाको कडा शब्दमा निन्दा गरेका छन्। इटाली, फ्रान्स, नेदरल्यान्ड्स, बेल्जियम र स्पेनले आ-आफ्नो देशमा रहेका इजरायली राजदूतलाई बोलाएर कूटनीतिक विरोध (डेमार्श) दर्ता गराएका छन्।
​आफ्नै क्याबिनेट र प्रधानमन्त्रीको असन्तुष्टि
चौतर्फी दबाबपछि इजरायलका प्रधानमन्त्री बिन्यामिन नेतान्याहुले पनि आफ्नै मन्त्रीको बचाउ गर्न सकेनन्। प्रधानमन्त्री कार्यालयद्वारा जारी विज्ञप्तिमा भनिएको छ, ‘हमास समर्थक उक्साहटपूर्ण नौकाहरूलाई गजा प्रवेशमा रोक्ने इजरायलको पूर्ण अधिकार छ। तर, मन्त्री बेन-जभिरले प्रदर्शनकारीहरूसँग गरेको व्यवहार इजरायलको मूल्य र मापदण्ड अनुकूल छैन।’ नेतान्याहुले ती कार्यकर्ताहरूलाई यथासक्य चाँडो देश निकाला गर्न निर्देशन दिएका छन्।
​यसअघि इजरायलका विदेशमन्त्री गिडियन सारले पनि मन्त्री बेन-जभिरको हर्कतले जानाजानी देशको छविमा धक्का पुर्‍याएको आरोप लगाएका थिए।
​के थियो फ्लोटिला अभियान?
‘ग्लोबल सुमुद फ्लोटिला’ ४० भन्दा बढी देशका ४३० मानवाधिकार कार्यकर्ताहरूको एउटा नागरिक अभियान हो, जुन गजाका नागरिकका लागि शिशु आहार, खाद्यान्न र औषधि लिएर टर्कीबाट प्रस्थान गरेको थियो। इजरायली नौसैनिक कमान्डोहरूले अन्तर्राष्ट्रिय जलक्षेत्रमै ती डुङ्गाहरूलाई नियन्त्रणमा लिएर अशदोद बन्दरगाह पुर्‍याएका थिए।
​इजरायलले यसलाई हमासको हितका लागि गरिएको ‘पीआर स्टन्ट’ भनेको छ। अक्टोबर २०२३ देखि सुरु भएको इजरायल–हमास युद्धका कारण गजा क्षेत्रमा हालसम्म ७२ हजार ७ सयभन्दा बढी मानिसको ज्यान गइसकेको छ।