​गुवाहाटी: असमका मुख्यमन्त्री हिमन्त बिस्वा सरमाले गुवाहाटीको रूपनगरस्थित कामरूप महानगर जिल्ला आयुक्तको नवनिर्मित अत्याधुनिक कार्यालय भवनको उद्घाटन गर्नुभएको छ। सार्वजनिक सेवा प्रवाहलाई थप सहज, सुलभ र जनताकेन्द्रित बनाउने उद्देश्यले यो नयाँ प्रशासनिक भवनको निर्माण गरिएको हो।
​कुल ८१.२० करोड रुपैयाँको लागतमा निर्मित यो तीन तले भवन १२,७०० वर्गमिटर क्षेत्रमा फैलिएको छ। भविष्यमा आवश्यकताअनुसार यसमा थप दुई तला थप्न सकिने गरी संरचना तयार पारिएको छ। यस भवनको शिलान्यास सन् २०२३ जनवरी ५ मा ‘विकासका लागि एक दिन’ कार्यक्रमअन्तर्गत गरिएको थियो।
​कार्यक्रमका क्रममा मुख्यमन्त्री सरमाले आसामका ३५ वटै जिल्ला आयुक्त कार्यालयहरूलाई थप व्यवस्थित र जनमुखी बनाउने समग्र दृष्टिकोणका साथ सरकार अघि बढिरहेको बताउनुभयो। नागरिकहरूले सरकारी कामका लागि बारम्बार कार्यालय धाउन नपरोस् र एकै पटकमा आफ्ना समस्याको समाधान पाएर सन्तुष्ट भई घर फर्किन सकून् भन्ने ध्येयका साथ काम भइरहेको उहाँको भनाइ थियो।