नयाँ दिल्ली: फिफा वर्ल्ड कप २०२६-मा अष्ट्रेलियाको साथमा स्कटल्याण्डले जीतको स्वाद चाख्यो भने स्विट्जरल्याण्डले चाहिँ निराशाजनक ड्रमा चित्त बुझाउनु पऱ्यो।अष्ट्रेलियाले वर्ल्ड कपमा प्रभावशाली शुरुवात गर्दै क्यानाडाको बिसी प्लेस भ्यानकुभर स्टेडियममा आइतवार बिहान भएको म्याचमा तुर्कीलाई २–०-ले पराजित गऱ्यो। अष्ट्रेलियाको तर्फबाट म्याचमा नेस्टोरी इरानकुण्डा र कोनर मेटाकाल्फले एक–एक गोल गरे। म्याचमा ३७ प्रतिशत पोजेशनको साथ खेल्ने अष्ट्रेलियाको निम्ति २७औं मिनटमा नेस्टोरीले गोलको खाता खोले। तुर्कीले मध्यान्तर अघि सक्दो प्रयास गरे पनि बराबरी हासिल गर्न सकेन। त्यसपछि ७५औं मिनटमा अष्ट्रेलियाका कोनरले गोल गरेर स्कोर २–० पुऱ्याए। म्याचमा ६३ प्रतिशत बल पोजेसन राखेर खेल्दै २८ पल्ट विपक्षी पोस्टमा हमला गरे पनि तुर्कीले गोल गर्न सकेन। म्याचमा तुर्कीले दुई दर्जनभन्दा अधिक अवसर पाएको थियो तर टीमले सफलता हासिल गर्न सकेन। यो जीतको साथ अष्ट्रेलिया ग्रुप डी मा ३ अंकको साथ गोल अन्तरको आधारमा दोस्रो स्थानमा रहन पुग्यो। यस ग्रुपमा ३ अंक लिएर सह-आयोजक अमेरिका गोलअन्तरको आधारमा शीर्ष स्थानमा छ। तुर्की र पाराग्वेले झोली रित्तो रहेको छ।
यसबीच २८ वर्षपछि फिफा वर्ल्ड कप खेलिरहेको स्कटल्याण्डले असाधारण शुरुवात गऱ्यो। अमेरिकाको बोस्टन स्टेडियममा आइतवार बिहान भएको म्याचमा स्कटल्याण्डले हाइतीविरुद्ध १–०-ले जीत हासिल गऱ्यो। स्कटल्याण्डको जीतमा जोन म्याकगिनले निर्णायक गोल गरे। जोनले २९औं मिनटमा गरेको गोलले नै स्कटल्याण्डको निम्ति निर्णायक साबित भयो। स्कटल्याण्डसँग बराबरी बल पोजेसन बनाए पनि हाइतीले गोल भने गर्न सकेन। यस जीतको साथ स्कटल्याण्डले ३ अंक लिएर ग्रुप सी-मा शीर्ष स्थानमा हासिल गऱ्यो। यस ग्रुपमा मोरक्को र ब्राजीलसँग बराबर एक–एक अंक रहेको छ। स्कटल्याण्डसँग पराजित हाइतीको झोली चाहिँ रित्तै छ। स्कटल्याण्डले यसअघि अन्तिमपल्ट साल १९९८-मा वर्ल्ड कप खेलेको थियो। यसरी स्कटल्याण्डको वर्ल्ड कपमा यो ३६ वर्षपछि पहिलो जीत पनि हो। यसअघि अन्तिमपल्ट साल १९९०-मा स्कटल्याण्डले स्वीडेनलाई २-१-ले पराजित गरेको थियो।
यसरी स्विट्जरल्याण्ड र कतरबीच खेलिएको फिफा वर्ल्ड कपको पाँचौं म्याच १-१-ले ड्र रह्यो। क्यालिफोर्नियाको सान फ्रान्सिस्को बे एरिया स्टेडियममा ६७,९६६ दर्शकअघि खेलिएको म्याचको १७औं मिनटमा ब्रेल एम्बोलोले पेनाल्टीबाट गोल गरी स्विट्जरल्याण्डलाई बढ़त दिलाए। पेनल्टी बक्सभित्र कतरका गोलकीपर महमूद अबुनादाले विपक्षी खेलाड़ीलाई लड़ाउँदा स्विट्जरल्याण्डले पेनल्टी पाएको थियो। त्यस मौकामा एम्बोलोले सहजै गोल गरे। म्याचमा ७० प्रतिशत पोजेशनको साथ खेलेको स्विस टीमले त्यस बढ़तलाई मध्यान्तरसम्म कायम राख्यो। दोस्रो हाफको म्याचमा पनि स्विट्जरल्याण्डको वर्चस्व रह्यो अनि टीमले दोस्रो गोलको खोजमा लगातार आक्रमण गऱ्यो। म्याच सम्पूर्ण रूपमा आफ्नो नियन्त्रणमा राखे पनि स्विट्जरल्याण्डले दोस्रो गोल हासिल गर्न सकेन। दोस्रो गोल गर्न नसके पनि एक समय स्विस टीम जीतको नजिक पुगिसकेको थियो, तर इञ्ज्युरी टाइममा कतरको भाग्य चम्कियो। म्याचको ८८औं मिनटमा मैदानमा प्रवेश गरेका स्थानापन्न खेलाड़ी मिरो मुहीमले इञ्ज्युरी टाइमको चौथो मिनटमा आत्मघाती गोल गर्दा कतरले म्याच बचाउनुका साथै महत्त्वपूर्ण १ अंक पनि हासिल गऱ्यो। कतरले चार सालअघि आफ्नै देशमा भएको वर्ल्ड कपमा राम्रो प्रदर्शन गर्न सकेको थिएन अनि यसपल्ट पनि टीमलाई पहिलो म्याचमा संघर्ष गरिरहेको देखियो।