सडक सञ्जाल ठप्प, एक घर भत्कियो, उद्धार र राहतका लागि प्रशासन तयारी अवस्थामा

​गान्तोक: “गान्तोकका जिल्ला अधिकारी (डिस्ट्रिक्ट कलेक्टर) श्री रोहन रमेश अगवणे (त्तईएईस) को निर्देशनमा आज (१५ जुलाई) गान्तोक जिल्ला अन्तर्गत ५१-क्योग्नोस्ला जीपीयूको ७ माइल क्षेत्रमा एक संयुक्त निरीक्षण टोलीले स्थलगत अनुगमन गरेको छ। विगत केही समयदेखि भइरहेको अविरल वर्षाका कारण त्यस क्षेत्रमा पुगेको क्षतिको विवरण संकलन गर्न यो निरीक्षण गरिएको हो।
​निरीक्षण टोलीमा कवि-लुङशोक निर्वाचन क्षेत्रका माननीय विधायकका ओएसडी श्री लाजोङ भोटिया, माननीय जिल्ला पञ्चायत सदस्य एवं भोजोघारीका माननीय काउन्सिलर श्री ओङदेन भोटिया, गान्तोक जिल्ला विपद् व्यवस्थापन प्राधिकरणका सह-निर्देशक श्री सोनाम वाङ्गेल लेप्चा, मुख्य नापी अधिकृत (हेड सर्वेयर) श्री शेराब भोटिया तथा स्थानीय बासिन्दाहरूको उपस्थिति रहेको थियो।
​मुख्य सडक सञ्जाल पूर्ण रूपमा अवरुद्ध
​स्थलगत निरीक्षणका क्रममा टोलीले अविरल वर्षाका कारण करिब २०० मिटर सडकखण्ड पूर्ण रूपमा बगेको पाएको छ। सडक बगाएपछि यस क्षेत्रमा सवारी साधनको आवतजावत ठप्प भएको छ, जसका कारण स्थानीय बासिन्दाले ठूलो सास्ती खेप्नुपरिरहेको छ।
​एक घर पूर्ण रूपमा ध्वस्त, गुम्बा र मन्दिरमा क्षति
​निरीक्षणका क्रममा सो क्षेत्रका थुप्रै आवासीय घरहरूमा सामान्यदेखि गम्भीर प्रकारका चिरा (क्रेक) परेको पाइएको छ। वर्षा र पहिरोका कारण एउटा घर पूर्ण रूपमा भत्किएको छ भने अन्य थुप्रै घरहरूमा गम्भीर क्षति पुगेकाले त्यहाँ बस्न असुरक्षित देखिएको छ। यस प्राकृतिक विपत्तिमा हालसम्म कुनै मानवीय क्षतिको विवरण भने प्राप्त भएको छैन।
​यसैगरी, स्थानीय गुम्बा र मन्दिरको भौतिक संरचनामा पनि ठूलो क्षति पुगेको छ। सुरक्षालाई मध्यनजर गर्दै अर्को सूचना जारी नभएसम्मका लागि त्यहाँ धार्मिक गतिविधिहरू सञ्चालन गर्न रोक लगाइएको छ।
​अस्थायी राहत शिविरको व्यवस्था र पुनःस्थापनाको तयारी
​सुरक्षाको पूर्वसावधानी स्वरूप निरीक्षण टोलीले सो क्षेत्रमा रहेको एक मात्र सरकारी भवन ‘सिक्किम श्रमिक विश्राम गृह’ लाई अस्थायी राहत शिविरका रूपमा तोकेको छ। संकटकालीन अवस्थामा असुरक्षित घरहरूमा बसोबास गरिरहेका परिवारहरूलाई यसै विश्राम गृहमा स्थानान्तरण गरिनेछ।
​जिल्ला प्रशासनले क्षतिग्रस्त सडकको तत्काल मर्मत गरी यातायात पुनः सञ्चालन गर्न, भौतिक संरचनाको विस्तृत क्षति मूल्याङ्कन गर्न र प्रभावित नागरिकहरूको सुरक्षाका लागि आवश्यक राहत तथा पुनःस्थापनाका कार्यहरू तत्काल अघि बढाउन सम्बन्धित विभागहरूलाई निर्देशन दिएको छ।
जिल्ला प्रशासनले स्थितिलाई नजिकबाट नियालिरहेको र सार्वजनिक सुरक्षाका लागि प्रतिबद्ध रहेको जनाएको छ।