दार्जिलिङ: गोर्खाल्याण्ड क्षेत्रीय प्रशासन जीटीएका प्रमुख कार्यपाल तथा भारतीय गोर्खा प्रजातान्त्रिक मोर्चाका अध्यक्ष अनित थापाले गोर्खा जनमुक्ति मोर्चाका नेता बिमल गुरुङविरुद्ध दार्जिलिङ सदर थानामा औपचारिक उजुरी दर्ता गराएका छन्। उजुरीमा बिमल गुरुङले सामाजिक सञ्जालमार्फत् अत्यन्त भड्काउने, उत्तेजक र मानहानिकारक बयान दिएको आरोप लगाइएको छ।बउजुरी अनुसार, १५ मई २०२६ मा एउटा फेसबुक पेजमा बिमल गुरुङको एउटा भिडियो बयान प्रकाशित तथा प्रसारित गरिएको थियो। उक्त भिडियोमा गुरुङले सार्वजनिक रूपमा जनतालाई जहाँ भेटे पनि अनित थापालाई थुक्न आह्वान गरेका थिए। अनित थापाले उजुरीमा उल्लेख गरेका छन् कि बिमल गुरुङको यो बयान सामान्य राजनीतिक अभिव्यक्ति नभई जनतालाई आफूविरुद्ध शारीरिक आक्रमण, अपमान र धम्कीमा उक्साउने सुनियोजित प्रयास थियो। थापाका अनुसार यस प्रकारको सार्वजनिक आह्वानले दार्जिलिङ र कालिम्पोङको राजनीतिक रूपमा संवेदनशील वातावरणमा दंगा, मारपिट र हिंसात्मक अशान्ति निम्त्याउन सक्छ। थापाले भारतीय न्याय संहिता, २०२३ अन्तर्गत विभिन्न धाराहरू लागू हुने दाबी गरेका छन्। उजुरीमा उल्लिखित धारा ३५२ – सार्वजनिक अपमान गराउने उत्तेजक आचरण, धारा ३५३ सार्वजनिक अव्यवस्था र भीड आक्रमणमा उक्साउने, धारा १९६ शत्रुता र अशान्ति फैलाउने, धारा ३५१ आपराधिक धम्की, धारा ३५६ र ३५७ मानहानि रहेको छ। यस विषयमा थापाले पुलिससँग विभिन्न माग राखेका छन् जसमा
बिमल गुरुङ र भिडियो प्रकाशन तथा प्रसारणमा संलग्न सबैविरुद्ध तत्काल प्राथमिकी दर्ता गर्न, मूल भिडियो, अपलोड विवरण, मेटाडेटा, सर्भर रेकर्ड र सबै सम्बन्धित इलेक्ट्रोनिक प्रमाणहरू तत्काल सुरक्षित गर्न, भड्काउने सामग्रीको थप प्रसारण रोक्न निवारक कानुनी उपायहरू अपनाउन, सार्वजनिक शान्ति र सुरक्षा कायम राख्न कडा कदम चाल्न आदिको माग गरिएको छ।