नयाँ दिल्ली: मनसुनको प्रभाव देशमा तिब्र रुपमा देखिन थालेको छ। भारतीय मौसम विभागका अनुसार दक्षिणपश्चिमी वायुको प्रभावले आगामी पाँच दिन पश्चिम बङ्गाल र सिक्किममा भारी वर्षाको सम्भावना रहेको छ। मौसम विभागले एक विज्ञप्तिमा भन्यो, “दार्जीलिङ, कालेबुङ, जलपाईगढी, कोचबिहार, अलिपुरद्वार र सिक्किमका उप-हिमालय जिल्लाहरूमा पृथक ठाउँहरूमा भारी वर्षा हुनसक्छ। बङ्गालको खाडीबाट आएको दक्षिण र दक्षिणपश्चिमी वायुको प्रभावले वर्षाको सम्भावना रहेको छ।

राजस्थानका धेरै ठाउँमा प्रि–मनसुन वर्षा जारी छ। पछिल्लो २४ घण्टामा राज्यको बिकानेर, जोधपुर, जयपुर, अजमेर, कोटा र भरतपुर डिभिजनमा हल्कादेखि मध्यम वर्षा भएको छ। मौसम विज्ञान केन्द्र जयपुरका अनुसार यस अवधिमा सबैभन्दा बढी नोखा (बिकानेर) मा ४७ मिलिमिटर वर्षा भएको छ। माउन्ट आबु (सिरोही) मा ३५ मि.मि. रेकर्ड गरिएको थियो। दक्षिण पश्चिम मनसुन आफ्नो सामान्य मिति २७ जूनको आसपास दिल्ली पुग्नेछ। मनसुन सामान्य रूपमा अघि बढिरहेको छ, त्यसले थप प्रगति रोक्न सक्ने देखिँदैन। मनसुन देशका अधिकांश भूभागमा प्रवेश गरेको छ। अर्कोतर्फ, मङ्गलबार दिल्लीमा हल्का वर्षाको सम्भावना छ। बुधबारदेखि आइतबारसम्म बदली रहनेछ तर वर्षाको कुनै पूर्वानुमान छैन। भारी वर्षाले जम्मु र कश्मीरका धेरै भागहरू र पहिरोका कारण रणनीतिक रूपमा महत्त्वपूर्ण जम्मू-श्रीनगर राष्ट्रिय राजमार्ग बन्द भयो, जहाँ सयौं सवारी साधनहरू अड्किएका थिए। डोडा, किश्तवाड र रामबन जिल्लामा विद्यालय बन्द गरिएको छ।