उत्तर-पूर्वी राज्यहरूबिचको सहकार्य र दिगो पर्यटनमा जोड

​गान्ताेक/तवाङ: सिक्किमका मुख्यमन्त्री प्रेमसिंह गोले (तामाङ) ले अरुणाचल प्रदेशको तवाङमा आयोजित प्रतिष्ठित ‘१४औँ अन्तर्राष्ट्रिय पर्यटन मार्ट २०२६’ को उद्घाटन सत्रलाई सम्बोधन गर्नुभएको छ। भारत सरकारको पर्यटन मन्त्रालयको मार्गदर्शनमा अरुणाचल प्रदेश सरकारद्वारा आयोजित उक्त कार्यक्रममा मुख्यमन्त्री गोलेले उत्तर-पूर्वी भारतलाई विश्वकै उत्कृष्ट पर्यटकीय गन्तव्यका रूपमा विकास गर्न सबै राज्यहरूबिच हातेमालो हुनुपर्नेमा जोड दिनुभएको छ।

​सम्बोधनका क्रममा मुख्यमन्त्री गोलेले पवित्र भूमि तवाङ र सिक्किमसँगको ऐतिहासिक, सांस्कृतिक तथा धार्मिक सम्बन्धको स्मरण गर्नुभयो। उहाँले सिक्किम र अरुणाचल प्रदेशबिचको हिमाली सम्पदा, गुम्बा, जैविक विविधता र न्यानो आतिथ्यताको परम्पराले सिङ्गो उत्तर-पूर्वी क्षेत्रको विशिष्ट पहिचानलाई झल्काउने बताउनुभयो।
​सामाजिक सञ्जाल फेसबुकमार्फत कार्यक्रमका तस्बिरहरू सार्वजनिक गर्दै मुख्यमन्त्री गोलेले प्रधानमन्त्री नरेन्द्र मोदी, केन्द्रीय पर्यटन तथा संस्कृति मन्त्री गजेन्द्रसिंह शेखावत र अरुणाचल प्रदेशका मुख्यमन्त्री पेमा खाण्डूलाई भव्य निमन्त्रणा तथा आतिथ्यताका लागि हार्दिक धन्यवाद व्यक्त गर्नुभएको छ।
​मुख्यमन्त्री गोलेले उत्तर-पूर्वी आठवटा राज्यहरू (अष्टलक्ष्मी) मा पर्यटनको अथाह सम्भावना रहेको चर्चा गर्दै दिगो तथा जिम्मेवार पर्यटनको प्रवर्द्धन, पूर्वाधार र सडक सञ्जालको सुदृढीकरण, सांस्कृतिक सम्पदाको संरक्षण एवं युवाहरूका लागि स्वरोजगारका अवसर सिर्जना गर्नुपर्नेमा विशेष जोड दिनुभयो।
​सो अवसरमा उहाँले सिक्किममा पर्यटन विकासका लागि भइरहेका प्रगतिहरूबारे जानकारी गराउनुभयो। विशेषगरी राज्यमा सञ्चालित ‘मेगा होमस्टे योजना’, नयाँ तथा ओझेलमा परेका पर्यटकीय स्थलहरूको प्रवर्द्धन र विश्वस्तरीय पर्यटकीय पूर्वाधार निर्माणका क्षेत्रमा सिक्किमले हासिल गरेका उपलब्धिहरू प्रस्तुत गर्नुभयो। साथै, सिक्किमको आर्थिक समृद्धि र सहज यातायातका लागि जीवनरेखा मानिने ‘राष्ट्रिय राजमार्ग १०’ लाई बाह्रै महिना सञ्चालनयोग्य (अल-वेदर) राजमार्गका रूपमा सुदृढ बनाउनुपर्ने आवश्यकतालाई उहाँले पुनः दोहोर्‍याउनुभयो।
​प्रधानमन्त्री नरेन्द्र मोदीको दूरदर्शी नेतृत्वमा उत्तर-पूर्वी भारतले विकास, कनेक्टिभिटी र पर्यटनका क्षेत्रमा नयाँ उचाइ लिइरहेको भन्दै उहाँले ‘अष्टलक्ष्मी’ को अवधारणाले सिङ्गो क्षेत्रलाई एकताबद्ध भई अघि बढ्न प्रेरित गरेको उल्लेख गर्नुभयो। उत्तर-पूर्वी राज्यहरूबिचको आपसी सहकार्य, केन्द्र सरकारको निरन्तर सहयोग र स्थानीय समुदायको सक्रिय सहभागिताबाट नै यस क्षेत्रलाई प्राकृतिक, सांस्कृतिक र आतिथ्यताको सङ्गमका रूपमा विश्वभर चिनाउन सकिने विश्वास उहाँले व्यक्त गर्नुभयो।

​कार्यक्रमको सफल आयोजनाका लागि अरुणाचल प्रदेशका मुख्यमन्त्री पेमा खाण्डू तथा अरुणाचल सरकारलाई धन्यवाद दिँदै मुख्यमन्त्री गोलेले १४ औँ अन्तर्राष्ट्रिय पर्यटन मार्टको पूर्ण सफलताको शुभकामना व्यक्त गर्नुभएको छ।