सिलगढी: भारत-नेपाल सीमा क्षेत्रमा हुने अवैध वन्यजन्तु तस्करी तथा वन्यजन्तुसम्बन्धी अपराध नियन्त्रणका उद्देश्यले सिलगढीनजिकै सुकनास्थित एनआईसीमा आयोजना गरिएको दुई दिने क्षमता अभिवृद्धि तालिम कार्यक्रम शुक्रबार सम्पन्न भएको छ।
​अक्टोबर ८ र ९ तारिख सञ्चालन भएको उक्त तालिम दार्जिलिङ वन्यजन्तु प्रभाग र अशोक ट्रस्ट फर रिसर्च इन इकोलोजी एन्ड द इन्भायरन्मेन्ट (एट्री) को संयुक्त आयोजनामा सम्पन्न भएको हो। तालिममा भारत-नेपाल सीमा क्षेत्रमा खटिएका ‘र्यापिड रेस्पोन्स टिम’ (आरआरटी) का सदस्यहरूको सहभागिता रहेको थियो।
​यसैगरी कार्यक्रममा भारत र नेपालका सीमावर्ती क्षेत्रमा कार्यरत वन अधिकारीहरू, विभिन्न सुरक्षा तथा कानुन कार्यान्वयन एजेन्सीका प्रतिनिधिहरू एवं वन्यजन्तु अपराध नियन्त्रण ब्युरो (डब्ल्यूसीसीबी) को सीमा एकाइका अधिकारीहरूको समेत उपस्थिति थियो।
​तालिमका क्रममा सीमापार हुने वन्यजन्तु तस्करीको पहिचान, वन्यजन्तु अपराधको अनुगमन, गैरकानुनी गतिविधिको खोजी तथा यस्ता अपराध रोक्ने प्रभावकारी उपायहरूबारे गहन छलफल र प्रशिक्षण दिइएको थियो।
​कार्यक्रममा सुकनाका रेन्ज अफिसर दीपक रसाइली, वन्यजन्तु अपराध नियन्त्रण ब्युरोका निरीक्षक के. पोद्दार, डा. सुनिता प्रधान र डा. नकुल क्षेत्रीले विषयविज्ञका रूपमा प्रशिक्षण दिएका थिए। उनीहरूले वन्यजन्तु अपराधको अनुगमन, तस्करी सञ्जालको पहिचान र सीमापार हुने गैरकानुनी गतिविधि नियन्त्रण गर्ने रणनीतिबारे महत्त्वपूर्ण अनुभव तथा सुझावहरू प्रस्तुत गरेका थिए।