फुलबारी: फुलबारीको पश्चिम धानतला क्षेत्रमा चारलेन सडक निर्माण कार्यका लागि खनिएको पानीले भरिएको खाल्डोमा खसेर एक बालिका गम्भीर घाइते भएकी छन्। बालिकालाई उद्धार गरी अस्पताल पुऱ्याइएको छ। यस घटनाले स्थानीय क्षेत्रमा व्यापक चिन्ता र आक्रोश पैदा गरेको छ।​प्राप्त जानकारी अनुसार स्थानीय एक महिला आफ्नी सानो छोरी पाखी विश्वासलाई साथमा लिएर माटो झिक्न गएकी थिइन्। माटो सङ्कलन गरिसकेपछि ती महिला घर फर्किइन् भने बालिका सोही स्थानमै बसिरहिन्।​खेल्ने क्रममा बालिका अचानक निर्माण कार्यका लागि खनिएको र पानी जमेको गहिरो खाल्डोमा खस्न पुगिन्। धेरै बेर सम्म छोरीलाई नदेखेपछि आमाले खोजतलास सुरु गरिन् र सो स्थानमा नभेटिएपछि गुहार मागिन्।​आमाको रुवाबासी सुनेर नजिकै काम गरिरहेका निर्माण श्रमिकहरू घटनास्थलमा पुगेका थिए। उनीहरूले तुरुन्तै खाल्डोमा पसेर बालिकालाई पानीबाट बाहिर निकाले। उद्धार गर्दा बालिकाको सास चलिरहेको श्रमिकहरूले बताएका छन्।​उद्धारलगत्तै बालिकालाई फुलबारीको एक निजी अस्पताल लगिएको थियो। त्यहाँ प्राथमिक उपचारपछि उनलाई थप उपचारका लागि उत्तर बङ्गाल मेडिकल कलेज अनि अस्पताल (एनबीएमसीएच) प्रेषित गरियो। घाइते बालिका पाखी विश्वासको हाल एनबीएमसीएचमा उपचार चलिरहेको छ।