कोलकाता: राज्यमा अभिन्न नागरिक संहिता (यूसीसी) लागू गर्ने उद्देश्यले गठन गरिएको आयोगको काम सहज रूपमा अघि बढिरहेको मुख्यमन्त्री शुभेन्दु अधिकारीले बताएका छन्।
नवान्नमा सोमबार पत्रकारहरूसँग कुरा गर्दै मुख्यमन्त्री अधिकारीले अवकाशप्राप्त न्यायाधीश रञ्जना प्रकाश देसाईको नेतृत्वमा गठित आयोगले सरकारको प्रत्यक्ष हस्तक्षेपबिना स्वतन्त्र रूपमा काम गरिरहेको जानकारी दिए। आयोगको दिल्लीमा बैठकसमेत सम्पन्न भइसकेको र राज्यका पाँचवटा क्षेत्रमा जनसुनुवाइ गर्ने योजना रहेको उनले बताए।
मुख्यमन्त्रीले आयोगको काममा सरकारले कुनै हस्तक्षेप नगर्ने स्पष्ट पारे। विभिन्न पक्षको राय, सुझाव र सरोकारलाई समेटेर आयोगले प्रतिवेदन तयार गर्ने अपेक्षा गरिएको छ।
आयोगको प्रतिवेदन प्राप्त भएपछि यूसीसी कार्यान्वयन गर्न सिफारिस भएमा त्यसबारे मन्त्रिपरिषद्को स्वीकृति लिएर विधानसभामा विधेयक पेश गरिने मुख्यमन्त्री अधिकारीले बताए।
यूसीसी लागू गर्ने विषयमा राज्य सरकारको तयारी अघि बढेसँगै आयोगको प्रतिवेदनलाई अब विशेष चासोका साथ हेरिएको छ।